وزیر اعظم مودی آج کریں گے اپنے پارلیمانی حلقہ وارانسی کا دورہ، کاشی کو دیں گے 28 پروجیکٹوں کا تحفہ
وزیر اعظم نریندر مودی آج اپنے پارلیمانی حلقہ وارانسی کے ایک روزہ دورے پر پہنچ رہے ہیں، اس دوران وہ یہاں کے لوگوں کو 1780 کروڑ کے 28 ترقیاتی پروجیکٹوں کا تحفہ پیش کریں گے
![وزیر اعظم نریندر مودی / یو این آئی](https://media.assettype.com/qaumiawaz%2F2022-10%2F1c5ea808-4eb8-41c6-9c9a-688e6edfe78f%2F16OCTNK1U.jpg?rect=0%2C140%2C3647%2C2051&auto=format%2Ccompress&fmt=webp)
وارانسی: وزیر اعظم نریندر مودی جمعہ (24 مارچ) کو اپنے پارلیمانی حلقہ وارانسی کے ایک روزہ دورے پر پہنچ رہے ہیں۔ اس دوران وہ کاشی کے لوگوں کو 1780 کروڑ کے 28 ترقیاتی پروجیکٹوں کا تحفہ دیں گے۔ وزیر اعظم مودی کاشی میں تقریباً پانچ گھنٹے قیام کریں گے۔ رپورٹ کے مطابق پی ایم مودی کا صبح تقریباً 10 بجے لال بہادر شاستری بین الاقوامی ہوائی اڈے پر اتر پردیش کی گورنر آنندی بین پٹیل اور وزیر اعلیٰ یوگی آدتیہ ناتھ استقبال کریں گے۔
وزیر اعظم پہلے عالمی یوم ٹی بی کے موقع پر وارانسی کے ’رودراکش کنونشن سنٹر‘ میں 'ون ورلڈ ٹی بی سمٹ' پر مبنی تین روزہ کانفرنس کا افتتاح کریں گے۔ اس کے بعد وہ سمپورنانند سنسکرت یونیورسٹی میں جلسہ عام سے خطاب کریں گے۔ اس دوران وزیر اعظم اپنے پارلیمانی حلقے کو تقریباً 1780 کروڑ کے 28 پروجیکٹوں کا تحفہ پیش کریں گے۔
ڈویژنل کمشنر کوشل راج شرما کے مطابق تقریباً 200 کروڑ روپے کے 20 پروجیکٹوں کا افتتاح وزیر اعظم کے ہاتھوں سے ہوگا۔ اس میں ہوائی اڈے پر اے ٹی سی ٹاور، کارکھیانو میں ایک پیک ہاؤس کی تعمیر، انٹر ہاؤس طواف کا راستہ، پولیس لائن بیرک اور مختلف اسمارٹ سٹی پروجیکٹس شامل ہیں۔ اس کے علاوہ پی ایم مودی 1500 کروڑ سے زیادہ کے نو بڑے پروجیکٹوں کا سنگ بنیاد رکھیں گے۔ اس میں اربن پبلک ٹرانسپورٹ روپ وے، نمامی گنگا سے بھگوان پور کا مجوزہ ایس ٹی پی، سگرا اسٹیڈیم کے فیز 2 اور 3 کا کام، پینے کے پانی کی اسکیم، بھرتھرا پی ایچ سی، ایل ای ڈی پیکٹ یونی پول، فلوٹنگ جیٹی اور چینج روم، سیواپوری میں قائم ایم پی ایل بوٹلنگ پلانٹ جیسے منصوبے شامل ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔