مدھیہ پردیش: ہوم گارڈ کینٹین میں پڑے ملے پوسٹل بیلٹ، کانگریس ناراض

مدھیہ پردیش اسمبلی انتخابت کے بعد سے اب تک ای وی ایم کے رکھ رکھاؤ کو لے کر کئی شکایتیں موصول ہو چکی ہیں اور کانگریس نے اس گڑبڑی کے تعلق سے الیکشن کمیشن میں شکایت بھی کی ہے۔ ای وی ایم کے بعد اب پوسٹل بیلٹ کو لے کر بھی سوال اٹھائے جانے لگے ہیں۔ کانگریس کارکنان کو مدھیہ پردیش پولس کی بھوپال میں واقع کینٹین میں کچھ ایسے پوسٹل بیلٹ ٹیبل پر پڑے دکھائی دیئے جن کے بارے میں کسی کو کچھ معلوم نہیں۔

واضح رہے مدھیہ پردیش میں انتخابی ڈیوٹی پر تعینات پولس اہلکاروں کے لئے چار ہزار پوسٹل بیلٹ جاری کئے گئے تھے۔ پولس ایس ایس بی اور ہوم گارڈ کے لئے جاری یہ پوسٹل بیلٹ گنتی کے یعنی 11 دسمبر کو الیکشن کمیشن پہنچنے تھے۔

پولس کینٹین کے ساتھ ہوم گارڈ آفس کی کینٹین میں یہ پوسٹل بیلٹ دکھائی دیئے۔ کانگریس رہنما کرشنا گھٹکے نے ایک چینل سے بات چیت میں بتایا کہ ’’میں منگل کو ہوم گارڈ کی کینٹین میں پہنچا، مجھے اس کی خبر ملی تھی۔ میں نے کینٹین کے اندر پوسٹل بیلٹ کے 250 لفافہ اور باہر تین لفافہ ایسے ہی دیکھے جنہیں کوئی پوچھنے والا نہیں تھا‘‘۔ گھٹکے کا الزام ہے کہ پوسٹل بیلٹ گزشتہ تین روز سے کینٹین میں پڑے ہوئے تھے۔ انہوں نے کہا کہ پارٹی اس بڑی گڑبڑی کی ریاستی الیکشن کمیشن سے شکایت کرے گی۔

دوسری جانب خبر ملتے ہی جنوب مغربی بھوپال سیٹ سے کانگریس کے امیدوار شرما اور کئی کانگریسی رہنماؤں کے ہمراہ ہوم گارڈ کینٹین پہنچے۔ شرما نے کہا کہ مدھیہ پردیش کے افسران نے پورے انتخابی عمل کا مذاق بنایا ہوا ہے۔ انہوں نے کہا کہ ہوم گارڈ کی ٹیبل پر کئی پوسٹل بیلٹ پیپر یوں ہی پڑے ہونا ایک انتہائی سنجیدہ معاملہ ہے۔