کشمیر: پارلیمانی انتخابات کے پہلے مرحلے کی پولنگ جاری، ریل خدمات معطل

سری نگر: مشترکہ مزاحمتی قیادت کی طرف سے کشمیر بند کال کے پیش نظر وادی کشمیر میں جمعرات کے روز ٹرین سروس معطل رہی۔ واضح رہے کہ وادی کشمیر میں مشترکہ مزاحمتی قیادت بشمول سید علی شاہ گیلانی (سربراہ حریت گ)، میرواعظ محمد عمر فاروق (سربراہ حریت ع) اور جموں کشمیر لبریشن فرنٹ نے جمعرات کو مکمل اور ہمہ گیر 'کشمیر بند' کی کال دی تھی جبکہ پارلیمانی الیکشن کے ضمن میں الیکشن کے دن متعلقہ انتخابی حلقے کے اندر مکمل ہڑتال کی کال دے رکھی ہے۔

ایک ریلوے عہدیدار نے یو این آئی کو بتایا کہ حکام بشمول پولس کی طرف سے ہدایات موصول ہونے کے بعد جمعرات کے روز وادی میں ٹرین سروس کو بنا بر احتیاط معطل رکھنے کا فیصلہ لیا گیا۔ انہوں نے بتایا کہ حکام کی ہدایات پر عمل کیا جاتا ہے کیونکہ مسافروں، ریلوے عملے اور ریلوے املاک کا تحفط اہم ہے۔

قابل ذکر ہے کہ ماضی میں احتجاجوں کے دوران ریلوے املاک کو بے تحاشا نقصان پہنچا ہے۔ بتادیں کہ سیکورٹی لحاظ سے حساس مانی جانے والی ریاست جموں وکشمیر میں جمعرات کو عام انتخابات کے پہلے مرحلے کے تحت جموں اور بارہمولہ پارلیمانی حلقوں میں ووٹ ڈالے گئے۔ سات اضلاع پر پھیلے جموں اور بارہمولہ پارلیمانی حلقوں میں پولنگ کے لئے سیکورٹی سمیت دیگر تمام انتظامات مکمل کیے گئے تھے۔