جموں و کشمیر میں تبدیلی کی ہوا، کانگریس-این سی اتحاد کامیاب ہوگا: سچن پائلٹ

اُدھم پور: کانگریس کے جنرل سکریٹری سچن پائلٹ نے اُدھم پور میں ایک انتخابی جلسے سے خطاب کرتے ہوئے جموں و کشمیر میں اسمبلی انتخابات کے حوالے سے اپنی توقعات کا اظہار کیا۔ انہوں نے کانگریس کے امیدواروں کے حق میں ووٹ دینے کی اپیل کی اور بی جے پی پر کڑی تنقید کی۔

پائلٹ نے میڈیا سے بات کرتے ہوئے کہا کہ بی جے پی کا یہ دعویٰ کہ وہ مکمل اکثریت کے ساتھ حکومت بنانے جا رہی ہے، محض ایک ’خیالی پلاؤ‘ ہے۔ انہوں نے کہا، "بی جے پی یہ سمجھ چکی ہے کہ اس ریاست میں کانگریس اور نیشنل کانفرنس کا اتحاد ایک نئی حکومت بنائے گا۔‘‘

انہوں نے مزید کہا، ’’بی جے پی نے ایل جی کے ذریعے حکومت کی اور عوام کو ان کے حقوق سے محروم کر دیا۔ یہاں تبدیلی کی ہوا چل رہی ہے اور لوگوں نے تبدیلی کا ارادہ کر لیا ہے۔ بی جے پی کے خلاف ملک بھر میں ایک ماحول بن رہا ہے اور لوگ کانگریس کو ایک بہتر متبادل سمجھنے لگے ہیں۔‘‘

سچن پائلٹ نے کہا اپوزیشن کی آواز کو دبانے کی کوشش کی جا رہی ہے۔ یہاں انتظامیہ اور حکومت کی ملی بھگت بھی محسوس ہو رہی ہے۔ انہوں نے کہا کہ عوام نے اس بار بی جے پی کو سبق سکھانے کا عزم کر لیا ہے اور وہ ایک نئے پیغام کے ساتھ سامنے آئیں گے۔

ان کا کہنا تھا، ’’ہمیں یقین ہے کہ ہم ہر علاقے میں حکومت بنانے جا رہے ہیں، اور لوگوں کی ناراضگی اس بار بی جے پی کے لیے مہنگی ثابت ہوگی۔‘‘

قابل ذکر ہے کہ جموں و کشمیر میں اسمبلی انتخابات کے دو مراحل کی ووٹنگ ہو چکی ہے جبکہ تیسرے اور آخری مرحلے کی ووٹنگ یکم اکتوبر کو ہوگا۔ نتائج کا اعلان 8 اکتوبر کو ہونے والی ووٹ شماری کے بعد کیا جائے گا۔