پولیس خوف و ہراسانی کے بجائے نرمی و ہمدردی کے ساتھ کام کرے: جمعیۃ علماء ہند

حیدرآباد: جمعیۃ علماء ہند ضلع وقار آباد (تلنگانہ) کے تین رکنی وفد نے مولانا محمد عبداللہ اظہر قاسمی صدر جمعیۃ علماء ضلع وقار آباد کی قیادت میں لاک ڈاؤن کے ضمن میں تانڈور ڈی ایس پی لکشمی نارائنا اور سرکل انسپکٹر روی کمار سے ملاقات کرتے ہوئے لاک ڈاؤن کے دوران جمعیۃ علماء ضلع وقارآباد کی بلاتفریق مذہب و ملت انسانی بنیادوں پر کی جا رہی خدمات سے واقف کر وایا۔

اس موقع پر دونوں پولیس عہدیداران نے زور دیتے ہوئے کہا کہ موجودہ حالات میں اس متعدی مرض کے تئیں انتہائی حساسیت اور سنجیدگی کا مظاہرہ کرنے کی ضرورت ہے۔ چھوٹی سی غفلت بھی”لمحوں نے خطاء کی تھی صدیوں نے سزاء پائی“ کے مترادف ہوگی

انہوں نے عوام سے گزارش کی کہ اس ضمن میں حکومت کی جانب سے دی جانے والی ہدایات پر عمل کرنے میں ہرگز کوتاہی نہ کریں اور پولیس کی جانب سے لاک ڈاؤن کے دوران گھروں میں رہنے کے سلسلہ میں کی جانے والی سختیوں کو اپنے اور اپنے اہل خانہ کے لئے فائدہ مند سمجھیں۔

اس موقع پر جمعیۃ علماء ضلع وقار آباد کے وفد نے کورونا وائرس کو میڈیا کی جانب سے مذہبی رنگ دے کر ایک خاص طبقہ کو نشانہ بنانے، ہراساں کرنے کی بھی مذمت کی اور کہا کہ اگر پولیس کو کسی شخص کو الگ تھلگ کرنا ہو تو اس کے اور اس کے اہل خانہ کے ساتھ خوف وہراسانی کا ماحول پیدا کرنے کے بجائے نرمی وہمدردی کے ساتھ اس کو الگ تھلگ کر دے۔

اس سلسلہ میں جمعیۃ علماء ضلع وقار آباد بھی پولیس کا بھرپور تعاون کرے گی۔ حافظ پیر خلیق احمد صابر جنرل سکریٹری جمعیۃ علماء تلنگانہ وآندھرا کی ہدایت پر لاک ڈاؤن کے دوران پولیس کے بھرپور تعاون کی یقین دہانی پر مشتمل مکتوب بھی ڈی ایس پی تانڈور کے حوالہ کیا گیا۔ اس وفد میں صدر جمعیۃ علماء ضلع وقارآباد مولانا محمد عبداللہ اظہر قاسمی، نائب صدر ڈاکٹر حافظ محمد عبدالسلام اور سکریٹری مولانا عبدالرحمن اطہر قاسمی شامل تھے۔