پی این بی کا ہزاروں کروڑ ہضم کرنے والے چوکسی نے ہندوستان آنے سے پھر کیا انکار

پنجاب نیشنل بینک (پی این بی) سے ہزاروں کروڑ روپے کی دھوکہ دہی کرنے کے الزام میں میہل چوکسی نے فی الحال انٹگوا سے ہندوستان آنے سے انکار کر دیا ہے۔ چوکسی نے ہفتہ کے روز انفورسمنٹ ڈائریکٹوریٹ سے کہا کہ وہ 3 مہینے تک ہندوستان نہیں آ سکتا۔ چوکسی نے یہ بھی کہا کہ اگر اس دوران انفورسمنٹ ڈائریکٹوریٹ ان کا بیان لینا چاہتی ہے تو وہ انٹگوا آئیں یا پھر ان کے صحت مند ہونے کا انتظار کریں۔

میہل چوکسی کو بھگوڑا قرار دینے سے متعلق داخل عرضی پر ہفتہ کو سماعت ممبئی کی عدالت میں ہوئی۔ سماعت کے دوران عدالت کو میہل چوکسی کے وکیل نے بتایا کہ چوکسی سفر کرنے کے لیے فی الحال پوری طرح صحت مند نہیں ہیں۔ اس لیے اگر عدالت چاہے تو ویڈیو کانفرنسنگ کے ذریعہ ان کا بیان درج کر سکتی ہے۔ وکیل نے یہ بھی کہا کہ میہل چوکسی صحت مند ہونے کے بعد عدالت میں آ کر اپنا بیان درج کرائیں گے۔

غور طلب ہے کہ ای ڈی نے ممبئی عدالت میں میہل چوکسی کو بھگوڑا مجرم قرار دینے سے متعلق ایک عرضی داخل کی ہے۔ چوکسی پی این بی میں تقریباً 13 ہزار 400 کروڑ روپے کے گھوٹالہ میں اپنے بھانجے نیرو مودی کے ساتھ اہم ملزم ہیں۔ وہ فی الحال انٹگوا کی شہریت لے کر وہیں مقیم ہیں۔ ہندوستانی جانچ ایجنسیاں اس کی خود سپردگی کی کوششیں کر رہی ہیں۔