پی این بی گھوٹالہ LIVE: نیرو مودی کو پہلا ’ایل او یو‘ جاری کرنے والا جنرل منیجر گرفتار

مرکزی تفتیشی بیورو (سی بی آئی) نے پنجاب نیشنل بینک (پی این بی) گھوٹالہ معاملہ میں بینک کے جنرل منیجر رینک کے ایک افسر کو دیر رات گرفتار کیا ہے۔ سی بی آئی ذرائع نے بتایا کہ جندل اگست 2009 سے 2011 کے درمیان پی این بی کے بریڈی ہاؤس برانچ کا انچارج تھا۔ اسی کے دور میں نیرو مودی کی کمپنی کو بغیر منظوری کے ایل اويو جاری کرنے کا سلسلہ شروع ہوا تھا۔ جندل فی الحال پی این بی ہیڈ کوارٹر میں جنرل منیجر(لون) کے عہدہ پر تعینات ہے۔

سی بی آئی نے کل رات نیرو مودی اور میہل چوکسی کی کمپنیوں کے پانچ عہدیداروں کو بھی گرفتار کیا تھا۔ اس سے پہلے جانچ ایجنسی نے پی این بی کے 10 افسران اور نیرومودی اور میہهل چوکسی کی کمپنیوں کے 18ملازمین سے دن میں پوچھ گچھ کی تھی۔

نیرو مودی کی کمپنی فائراسٹار انٹرنیشنل کے چیرمین (فنانس) ویپل امبانی، سینئر ایگزیکٹیو آفیسر ارجن پاٹل اور ایگزیکٹیو اسسٹنٹ کویتا مانکیکر کو گرفتار کیا گیا ہے۔ ویپل امبانی ریلائنس انڈسٹریز کے چیرمین مکیش امبانی کے کزن ہیں۔

میهل چوکسی کی کمپنی گیتانجلی گروپ کے دو عہدیدار کپل کھنڈیلوال ( فنانس افسر) اور نتن شاہی (منیجر) کو بھی گرفتار کیا گیا ہے۔

اس سے پہلے جانچ ایجنسی نے پی این بی کے 10 افسران اور نیرو مودی اور میهل چوکسی کی کمپنیوں کے 18 ملازمین سے پوچھ گچھ کی تھی۔

ریزرو بینک (آر بی آئی) نے پی این بی گھوٹالے کے پیش نظر بینکوں میں بڑھتی ہوئی جعلسازیوں کی وجوہات کی جانچ کے لئے ایک پانچ رکنی کمیٹی تشکیل دی ہے۔

ریزرو بینک نے بتایا کہ آر بی آئی کے مرکزی بورڈ آف ڈائریکٹرس کے سابق رکن وائی ایچ مالیگام کو کمیٹی کا صدر بنایا گیا ہے۔ بورڈ آف ڈائریکٹرز کے موجودہ رکن بھرت دوسی، کنارا بینک کے سابق چیرمین اور منیجنگ ڈائریکٹر اور سیبی کے سابق کل وقتی رکن ایس رمن اور ریزرو بینک کے انفارمیشن ٹیکنالوجی کے چیف ایگزیکٹیو آفیسر نند کمار سرودے کو کمیٹی کا ممبر بنایا گیا ہے۔ آر بی آئی کے ایگزیکٹیو ڈائریکٹر اے مشرا کمیٹی کے رکن سکریٹری ہوں گے۔

میگھالیہ میں کانگریس کے صدر راہل گاندھی نے کہا کہ دوسرے مودی جی، ہمارے وزیر اعظم نے ملک کے لوگوں کو سپنے بیچے، اچھے دنوں کے سپنے، ہر کسی کے کھاتے میں 15 لاکھ روپے آنے کے سپنے اور ہر سال دو کروڑ نوکریوں کے سپنے۔

کانگریس کے صدر راہل گاندھی نے میگھالیہ میں کہا کہ نیرو مودی نے بہت سے لوگوں کو سپنے (خواب) بیچے جن میں حکومت بھی شامل تھی لیکن حکومت سوتی ہی رہ گئی اور وہ لوگوں کی گاڑھی کمائی لے کر بھاگ گیا۔

نیرومودی معاملہ میں ای ڈی کی تفتیش میں بڑا انکشاف ہوا ہے۔ ای ڈی نے تقریباً 120 شیل کمپنیوں کی سرگرمیوں کو مشتبہ پایا ہے۔ ان میں سے 80 شیل کمپنیاں نیرو مودی کی ہیں۔ وہیں میہل چوکسی کی تقریباً 40 شیل کمپنیوں کا بھی پتہ چلا ہے۔

پی این بی گھوٹالے میں میہل چوکسی کے خلاف دھوکہ دہی کے معاملہ پر دہلی ہائی کورٹ میں سماعت ہوئی۔ میہل چوکسی کے وکیل سندیپ کپور نے کہا ’’میہل چوکسی اپنی کمپنی کے مالک ہیں، ان کی کمپنی کی کسی معاون کمپنی اور اس کی فرینچائزی کی طرف سے کئے گئے معاہدوں سے اس کا کوئی لینا دینا نہیں ہے اس لئے ان پر ایف آئی آر درج نہیں ہو سکتی۔‘‘ ہائی کورٹ نے دہلی پولس سے اس معاملہ میں اسٹیٹس رپورٹ دائر کرنے کو کہا ہے۔ اس معاملہ پر مزید سماعت کے لئے 3 مئی کی تاریخ مقرر کی گئی ہے۔

ریٹنگ ایجنسی فیچ کے بعد اب موڈیز بھی پی این بی کی ریٹنگ کم کرنے کے موڈ میں ہے۔ ایک بیان میں ایجنسی نے کہا ہے کہ پی این بی کی کریڈٹ اسیسمنٹ ریٹنگ کو بھی کم کیا جا رہا ہے۔

پی این بی گھوٹالے پر سپریم کورٹ میں عرضی داخل کرنے والے وکیل جے پی ڈھانڈا نے کہا ’’پیسوں کے ہیر پھیر کے معاملہ میں ملزم بینک ملازمین کے خلاف سخت کارروائی ہونی چاہئے اور اس گھوٹالے سے جڑے لوگوں کو عمر قید کی سزا ملنی چاہئے۔‘‘

پی این بی گھوٹالہ اب سپریم کورٹ تک پہنچ گیا ہے۔ ونیت ڈھانڈا نامی ایک وکیل نے اس معاملہ پر مفاد عامہ کی عرضی داخل کی ہے جسے سپریم کورٹ نے منظور کر لیا ہے۔ عرضی میں کہا گیا ہے کہ اس معاملہ میں پی این بی اور آر بی آئی کے اعلیٰ افسران کے خلاف کارروائی ہونی چاہئے۔ نیرو مودی کو دومہینے کے اندر واپس لانے کی اپیل بھی کی گئی ہے۔

عرضی میں کہا گیا ہے کہ معمولی سے قرض سے پریشان ہو کر کسان خود کشی کر رہے ہیں، وہیں نیرو مودی جیسے لوگ آرام سے بیرون ملک بھاگ رہے ہیں۔ سپریم کورٹ میں اب اس معاملہ پر 23 فروری یعنی جمعہ کو سماعت ہوگی۔

پی این بی گھوٹالے پر سی وی سی (سینٹرل وجلینس کمیشن) نے مرکز اور پی این بی سے 10 دنوں کے اندر رپورٹ سونپنے کو کہا ہے۔ کمیشن نے مرکز اور پی این بی سے کہا ہے کہ وہ اس گھوٹالے میں شامل افسران کے ناموں کو منظر عام پر لانے کو کہا ہے۔

ریٹنگ (درجہ بندی) ایجنسی فیچ (FITCH) نے پی این بی کو منفی فہرست میں ڈال دیا ہے۔ فیچ نے کہا ہے کہ پی این بی اب خطرے والے بینکوں میں آ گیا ہے۔ گھوٹالے سے ہوئے نقصان کا انداز لگانے کے بعد اس کی درجہ بندی کم بھی ہو سکتی ہے۔

پی این بی گھوٹالے کے تعلق سے ممبئی سی بی آئی ہیڈ کوارٹر میں گیتانجلی اور پی این بی کے 30 ملازمین کو پوچھ گھ کے لئے بلایا گیا۔ تمام 30 ملازمین کے بیرن ممالک کا سفر کرنے پر روک لگا دی گئی ہے۔

وزارت خزانہ نے ان خبروں کی تردید کی ہے جن میں یہ بتایا جا رہا تھا کہ پی این بی میں ہوئے 1.8 ارب کے گھوٹالے سے ہندوستانی بینکوں کو 3 ارب ڈالر کا نقصان ہوا ہے۔ وزارت خزانہ کی طرف سے خبر کو غلط قرار دیتے ہوئے ایک ٹوئٹ کیا گیا ہے۔ ’’میڈیا کے خاص طبقہ میں ایسی خبریں آ رہی ہیں کہ محکمہ انکم ٹیکس نے پی این بی میں ہوئے مبینہ گھوٹالے سے ہندوستانی بینکوں کو 3 ارب ڈالر سے زیادہ کے نقصان کا اندازہ لگایا ہے، جوکہ جھوٹ ہے اور حقیقی طور سے غلط ہے۔‘‘

پی این بی نے کہا ہے کہ لیٹر آف انڈر ٹیکنگ (ایل او یو) اور فارین لیٹرس آف کریڈٹ (ایف ایل سی) کے تحت قانون کے مطابق تمام ’مصدقہ ذمہ داریوں‘ کو پورا کیا جائے گا۔ بینک نے یہ اعلامیہ اپنی ویب سائٹ پر تحریر کیا ہے۔

ای ڈی (انفورسمنٹ ڈائریکٹوریٹ) کی طرف سے مدھیہ پردیش کے گوالیار میں گیتانجلی شوروم پر چھاپہ مارا ہے۔ گیتانجلی جویلرس کے مالک نیرو مودی کے ماموں میہل چوکسی ہیں۔ پی این بھی گھوٹالے میں ان کا بھی نام ہے اور وہ فرار چل رہا ہے۔