کل جماعتی میٹنگ میں وزیراعظم کے بیان پر اٹھے سوالات، پی ایم او کی وضاحت

وزیراعظم نریندر مودی کے کل جماعتی میٹنگ میں دیئے گئے بیان پر وضاحت دیتے ہوئے وزیراعظم کے دفتر نے آج کہا کہ کچھ جگہ پر وزیراعظم کے بیان کی غلط تشریح کی گئی ہے جبکہ وزیراعظم نے واضح الفاظ میں کہا تھا کہ ہندوستان حقیقی کنٹرول لائن تجاوز کرنے کی کسی بھی کوشش کا منہ توڑ جواب دے گا۔

وزیراعظم دفتر نے کہا کہ حقیقت میں وزیراعظم نے یہ بات زور دیکر کہی تھی کہ گزرے وقت میں ان چیلنجوں کو نظرانداز کیے جانے کی روایت کے برعکس اب ہندوستانی فوج حقیقی کنٹرول لائن پر کسی بھی طرح کی خلاف ورزی کا فیصلہ کن طریقہ سے جواب دیتی ہے۔ انہوں نے کہا کہ انہیں روکتے ہیں، انہیں ٹوکتے ہیں۔ کل جماعتی میٹنگ کو بھی یہ معلومات دی گئی تھیں کہ اس بار چینی فوج حقیقی کنٹرول لائن پر بڑی تعداد میں آئی ہے اور ہندوستان نے بھی اس کے مطابق قدم اٹھایا ہے۔

بیان میں کہا گیا ہے کہ جہاں تک حقیقی کنٹرول لائن پر تجاوز کا سوال ہے یہ واضح طور پر کہا گیا تھا کہ 15جون کو گلوان میں تشدد اس لئے ہوا کیونکہ چین کے فوجی حقیقی کنٹرول لائن پار کرکے ’اسٹرکچر‘ بنارہے تھے اور انہوں نے اس کام کو روکنے سے انکار کردیا تھا۔

وزیراعظم دفتر نے یہ بھی کہا کہ کل جماعتی میٹنگ میں وزیراعظم کے تبصرہ کا فوکس گلوان میں پندرہ جون کے وہ واقعات تھے جن کی وجہ سے 20 فوجیوں کی شہادت ہوئی۔ وزیراعظم نے ہمارے ان بہادر اور محب وطن فوجیوں کو خراج عقیدت دی جنہوں نے چینی سازش کا منہ توڑ جواب دیا۔

وزیراعظم کا یہ بیان کہ حقیقی کنٹرول لائن پر ہماری اور چینی فوجیوں کی موجودگی نہیں ہے، کیونکہ 16 بہار ریجیمنٹ کے فوجیوں کی قربانی نے چینی فوج کی اسٹرکچر کھڑا کرنے کی کوششوں اور حقیقی کنٹرول لائن کی اس جگہ سے تجاوز کی کوششوں کو ناکام کردیا۔ وزیراعظم کے الفاظ تھے ’جنہوں نے ہماری زمین پر تجاوزکرنے کی کوشش کی ہے انہیں ہماری مادر وطن کے بیٹوں نے سخت سبق سکھایا‘۔ وزیراعظم نے زور دے کر کہا ’میں آپ کو یقین دلانا چاہتا ہوں کہ ہماری مسلح افواج ہماری سرحدوں کی حفاظت میں کوئی کسر نہیں چھوڑے گی‘۔

(یو این آئی ان پٹ کے ساتھ)