کیا وزیر اعظم مودی نے ایودھیا فیصلے پر جسٹس گگوئی کو خط لکھا؟ حکومت کی وضاحت

نئی دہلی: حکومت نے جمعہ کے روز واضح کیا ہے کہ وزیر اعظم نریندر مودی نے ایودھیا میں رام مندر سے متعلق معاملے میں فیصلے کے بعد سپریم کورٹ کے چیف جسٹس رنجن گگوئی کو کوئی خط نہیں لکھا۔

ایک سرکاری ترجمان نے ٹویٹ کرتے ہوئے کہا، ’’ایودھیا فیصلے کے بارے میں وزیر اعظم نریندر مودی کی طرف سے چیف جسٹس آف انڈیا کو لکھا گیا ایک نام نہاد خط سوشل میڈیا پر گردش کر رہا ہے۔ انہوں نے کہا کہ ایسا کوئی خط نہیں لکھا گیا ہے۔ یہ خط جعلی اور بدنیتی پر مبنی ہے۔‘‘

رپورٹ کے مطابق بنگلہ دیش میں سوشل میڈیا پر وزیر اعظم مودی کا ایک نام نہاد خط وائرل ہو رہا ہے جس میں نریندر مودی نے ایودھیا فیصلے کے بعد جسٹس رنجن گگوئی کو مبارکباد دی ہے۔ ڈھاکہ میں ہندوستانی ہائی کمیشن نے اس خط کو جعلی قرار دیتے ہوئے اس کی شدید مذمت کی ہے۔ وزارت خارجہ کے ترجمان رویش کمار نے بھی اس پر تنقید کرتے ہوئے اسے بنگلہ دیش اور ہندوستان کے مابین دوستی کو کمزور کرنے کی سازش قرار دیا ہے۔