پی ایم مودی کے بھائی پرہلاد مودی لکھنؤ میں دھرنے پر بیٹھے، جانیے کیوں...

لکھنؤ سے ایک بڑی خبر سامنے آ رہی ہے جس میں بتایا جا رہا ہے کہ وزیر اعظم نریندر مودی کے بھائی پرہلاد مودی بدھ کی دوپہر اموسی ائیر پورٹ پر دھرنے پر بیٹھ گئے ہیں۔ پرہلاد مودی کا کہنا ہے کہ ان کے کچھ ساتھیوں کو پولس نے گرفتار کر لیا ہے اور جب تک انھیں آزاد نہیں کیا جاتا، وہ دھرنے سے نہیں اٹھیں گے۔ پی ایم مودی کے بھائی نے کہا ہے کہ اگر ان کے ساتھیوں کو آزاد نہیں کیا جاتا تو وہ بھوک ہڑتال بھی کریں گے۔

میڈیا ذرائع سے موصول ہو رہی خبروں کے مطابق پرہلاد مودی لکھنؤ ائیر پورٹ ارائیول ہال کے آگے دھرنے پر بیٹھے ہیں۔ دہلی سے آنے والی 2 بجے کی پرواز سے پرہلاد مودی لکھنؤ پہنچے تھے۔ ان کو سلطان پور اور جون پور میں یوگ سوشل سوسائٹی کی جانب سے اعزاز پیش کیا جانا تھا۔ لیکن پولس نے ایک دن پہلے ہی سوسائٹی اور اس کے پروگرام کو فرضی بتاتے ہوئے آرگنائزر کو حراست میں لے لیا۔ اس کارروائی سے پرہلاد مودی کے اعزاز میں منعقد پروگرام منسوخ ہو گیا۔

اب پولس کارروائی سے ناراض پرہلاد مودی نے ضد پکڑ لی ہے کہ جن حامیوں اور پروگرام آرگنائزرس کو گرفتار کیا گیا ہے، ان کو فوری بلاشرط رہا کیا جائے ورنہ ان کا دھرنا جاری رہے گا۔ پرہلاد مودی نے کہا کہ ’’مجھے ریسیو کرنے کے لیے جو لوگ آ رہے تھے، ان سب کو پولس نے گرفتار کر لیا ہے اور تھانہ میں بٹھا دیا ہے۔ ان پر مقدمہ درج کرنے کی تیاری چل رہی ہے۔‘‘ انھوں نے مزید کہا کہ ’’مجھے لگا کہ میرے بچے جیل میں رہیں اور میں باہر رہوں، یہ ٹھیک نہیں ہے۔ یا تو ان کو آزاد کرو ورنہ میں ائیر پورٹ پر بھوک ہڑتال پر بیٹھ گیا ہوں۔ کھانا پینا چھوڑ دیا ہے۔‘‘

پرہلاد مودی نے بتایا کہ پولس افسر کے مطابق یہ پی ایم او (وزیر اعظم دفتر) سے حکم ہے، لیکن میں کہتا ہوں کہ حکم کاپی مجھے دو تاکہ میں سچ کی راہ پر چل سکوں۔ انھوں نے مزید کہا کہ ’’غنڈہ گردی کرنے سے نہ تو یہاں کی حکومت کو فائدہ ہوگا، اور نہ ہی پی ایم او کو۔‘‘ پرہلاد مودی کا کہنا ہے کہ ان کے تقریباً 100 ساتھیوں کو پولس نے گرفتار کر لیا ہے اور ان کی گاڑیاں بھی ضبط کر لی گئی ہیں۔