لکھنؤ یونیورسٹی میں ’صد سالہ تقریب‘ 25 نومبر کو، پی ایم مودی بھی ہوں گے شریک

لکھنؤ: وزیر اعظم نریندر مودی لکھنؤ یونیورسٹی کے جشن صد سالہ تقریبات میں 25 نومبر کو ویڈیو کانفرنسنگ کے ذریعہ شرکت کریں گے۔ آفیشیل ذرائع نے پیر کو یہاں بتایا کہ وزیر اعظم نریندر مودی 25 نومبر کو لکھنؤ یونیورسٹی کے جشن صد سالہ تقریبات کے اختتامی پروگرام میں 5:30 شام شرکت کریں گے۔ پروگرام کے مطابق وزیر اعظم یونیورسٹی کے صد سالہ علاماتی سکے کی نقاب کشائی بھی کریں گے۔ اس موقع پر وہ انڈین پوسٹ کے ایک خصوصی یادگاری پوسٹل اسٹیمپ کو بھی جاری کریں گے۔

مرکزی وزیر دفاع اور لکھنؤ سے رکن پارلیمان راج ناتھ سنگھ، یوپی کی گورنر آنندی بین پٹیل اور وزیر اعلی یوگی آدتیہ ناتھ بھی اس تقریب میں موجود ہوں گے۔ لکھنؤ یونیورسٹی 1920 میں قائم کی گئی تھی اور اس وقت وہ اپنا سو سالہ جشن منا رہی ہے۔