’آپ نے تو گولڈ میڈلز کی جھڑی لگا دی‘، پی ایم مودی نے ایشین گیمز کے میڈلسٹس سے کی ملاقات

گزشتہ دنوں اختتام پذیر ایشین گیمز میں ہندوستانی کھلاڑیوں کی کارکردگی تاریخی رہی۔ ان کھلاڑیوں کی حوصلہ افزائی کے لیے آج وزیر اعظم نریندر مودی نے ایک تقریب میں سبھی سے ملاقات کی۔ اس دوران وزیر برائے کھیل انوراگ ٹھاکر اور کچھ دیگر اہم سیاسی لیڈران بھی موجود رہے۔ دہلی کے میجر دھیان چند اسٹیڈیم میں منعقد ہوئی اس تقریب میں پی ایم مودی نے ہانگزوؤ سے لوٹے سبھی کھلاڑیوں کا استقبال کیا۔

پی ایم مودی نے تقریب میں سبھی کھلاڑیوں کے ساتھ ساتھ ان کے اہل خانہ کو بھی نیک خواہشات پیش کیں۔ انھوں نے کہا کہ ہر چیز کی شروعات گھر سے ہوتی ہے اور اس کی شروعات کے لیے سبھی کھلاڑیوں کے والدین مبارکباد کے مستحق ہیں۔ انھوں نے مزید کہا کہ ایشیائی کھیلوں میں ہماری تاریخی کارکردگی ظاہر کرتی ہے کہ ہم درست سمت میں جا رہے ہیں۔ انھوں نے کھلاڑیوں کی تعریف کرتے ہوئے کہا کہ ’’آپ لوگوں نے تو گولڈ میڈل کی بارش کر دی۔ ایسا لگ رہا تھا کہ ہماری بیٹیاں ٹریک اینڈ فیلڈ میں سب سے آگے رہنے کے لیے اتری ہیں۔‘‘

قابل ذکر ہے کہ ہندوستان نے اس بار ایشیائی کھیلوں میں اپنی بہترین کارکردگی کا مظاہرہ کیا ہے۔ ہندوستانی کھلاڑیوں نے مجموعی طور پر 107 تمغے اپنے نام کیے ہیں اور ایک نئی تاریخ رقم کی ہے۔ اس سے قبل ایشیائی کھیلوں میں ہندوستان کی بہترین کارکردگی 70 تمغے جیتنے کی تھی۔ 2018 جکارتہ میں ہوئے ایشیائی کھیلوں میں ہندوستان نے یہ 70 تمغے جیتے تھے۔ اس بار ہندوستان نے سبھی ریکارڈ توڑتے ہوئے 107 تمغے حاصل کیے۔ پی ایم مودی ایشیائی کھیلوں کے دوران لگاتار کھلاڑیوں کا حوصلہ بڑھاتے رہے تھے اور ہر تمغہ حاصل کرنے پر انھیں مبارکباد پیش کر رہے تھے۔ آج باضابطہ ملاقات کر سبھی کھلاڑیوں کو انھوں نے مبارکباد پیش کی۔

کھلاڑیوں کی عزت افزائی کے لیے منعقد تقریب میں وزیر برائے کھیل انوراگ ٹھاکر نے پی ایم مودی سے مخاطب ہوتے ہوئے کہا کہ ’’آپ نے کھلاڑیوں کو جو سہولیات دی تھیں اور جس طرح سے انھیں آگے بڑھایا تھا، اسے کھلاڑیوں نے رائیگاں نہیں جانے دیا۔ کھلاڑیوں نے اپنا پسینہ بہا کر ملک کو 107 تمغے دلائے ہیں۔ اب پیرس اولمپک میں بھی ہمارے کھلاڑی نئی تاریخ رقم کریں گے۔‘‘

اس موقع پر ایک ڈاکومنٹری بھی دکھائی گئی جس میں بتایا گیا کہ 2014 کے مقابلے میں ہندوستان کا کھیل بجٹ کتنا بدلا ہے اور کس طرح ملک میں ہر کھیل کی حالت بہتر ہوئی ہے۔ 2014 کے مقابلے میں ملک کا مجموعی بجٹ تین گنا ہو چکا ہے۔ ’کھیلو انڈیا‘ جیسے منصوبوں نے ملک کے کونے کونے اور ہر گاؤں سے کھلاڑیوں کو قومی سطح پر شناخت دلائی ہے۔ علاوہ ازیں ’ٹاپس‘ جیسے منصوبوں نے قومی سطح کے کھلاڑیوں کو سبھی سہولیات دلائی ہیں، جس سے وہ ملک کے لیے تمغے جیت رہے ہیں۔