دہلی: پزّا بوائے میں کورونا وائرس کی تشخیص سے دہشت، 72 گھر کوارنٹائن

دہلی میں کورونا کے مریضوں کی تعداد لگاتار بڑھ رہی ہے اور اس درمیان ایک پزّا ڈیلیوری بوائے کے بھی کورونا پازیٹو ہونے کی خبریں موصول ہو رہی ہیں۔ اس خبر سے پوری دہلی میں دہشت کا ماحول ہے کیونکہ پزّا ان کھانے کی اشیاء میں شامل ہے جو تقریباً ہر گھروں میں پسند کیا جاتا ہے اور آرڈر دے کر منگایا جاتا ہے۔ معاملہ جنوبی دہلی کے مالویہ نگر علاقہ کا ہے جہاں پزا ڈیلیوری بوائے کے کورونا پازیٹو پائے جانے کی خبر کے بعد 72 گھروں کو کوارنٹائن کرنے کا فیصلہ کیا گیا ہے۔

میڈیا ذرائع سے موصول ہو رہی خبروں کے مطابق مالویہ نگر علاقہ میں کورونا پازیٹو اس ڈیلیوری بوائے نے گزشتہ 15 دنوں میں تقریباً 72 گھروں میں پزا کی ڈیلیوری کی تھی۔ اس سلسلے میں پوری تفصیل حاصل کرنے کے بعد مقامی انتظامیہ نے سبھی 72 گھروں کی شناخت کر کے سبھی لوگوں کو کوارنٹائن کا حکم دے دیا ہے۔ بتایا جا رہا ہے کہ مالویہ نگر کے پانچ کلو میٹر کے دائرے میں اس ڈیلیوری بوائے نے پزا پہنچایا تھا۔

پزا ڈیلیوری بوائے کے تعلق سے بتایا جا رہا ہے کہ اسے گزشتہ 30 دنوں سے کھانسی اور زکام تھا۔ چونکہ اس نے کہیں باہر کا سفر نہیں کیا تھا اس لیے اس کا کووڈ-19 ٹیسٹ نہیں کرایا گیا تھا۔ لیکن طبیعت زیادہ خراب ہونے پر جب ٹیسٹ کرایا گیا تو اس میں کورونا کی تشخیص ہوئی۔ واقعہ سامنے آنے کے بعد مالویہ نگر علاقہ میں ایک دہشت کا ماحول دیکھنے کو مل رہا ہے۔ انتظامیہ ہر ممکن کوشش کر رہی ہے کہ جن 72 گھروں کی نشاندہی کی گئی ہے، وہاں کسی بھی طرح کی لاپروائی نہ ہو اور لوگ کوارنٹائن کے ضابطوں پر عمل کریں۔