پٹرول اور ڈیزل کی قیمتوں میں دو روپے فی لیٹرکی کمی

مرکزی حکومت نے لوک سبھا انتخابات سے قبل اور انتخابی ضابطہ اخلاق کے نفاذ سے قبل جمعرات کو پٹرول اور ڈیزل کی قیمتوں میں 2 روپے فی لیٹر کی کمی کی۔مرکزی پٹرولیم اور قدرتی گیس کے وزیر ہردیپ سنگھ پوری نے ایکس پر کہا کہ پٹرول اور ڈیزل کی قیمتوں میں 2 روپے فی لیٹر کی کمی کی گئی ہے اور نئی قیمتیں 15 مارچ کی صبح 6 بجے سے لاگو ہوں گی۔

پٹرولیم اور قدرتی گیس کی وزارت نے "ایکس" کو بتایا کہ آئل مارکیٹنگ کمپنیوں نے مطلع کیا ہے کہ انہوں نے ملک بھر میں پٹرول اور ڈیزل کی قیمتوں میں کمی کی ہے۔ آج کا یہ فیصلہ وزیر اعظم نریندر مودی کی جانب سے گزشتہ ہفتے 8 مارچ کو خواتین کے عالمی دن کے موقع پر ایل پی جی گیس سلنڈر کی قیمت میں 100 روپے کی کمی کے اعلان کے بعد کیا گیا ہے۔

پٹرولیم اور قدرتی گیس کی وزارت کے نوٹیفکیشن کے مطابق "پٹرول اور ڈیزل کی قیمتوں میں کمی سے صارفین کے  پاس اخراجات کے لئے زیادہ پیسہ رہے گا اور 58 لاکھ سے زیادہ بھاری سامان کی گاڑیوں، 6 کروڑ کاروں اور 27 کروڑ دو پہیہ گاڑیوں کے آپریٹنگ اخراجات میں کمی آئے گی۔‘‘

ہردیپ پوری نے کہا کہ پٹرول اور ڈیزل کی قیمتوں میں 2 روپے کی کمی کر کے وزیر اعظم مودی نے ایک بار پھر ثابت کر دیا ہے کہ کروڑوں ہندوستانی خاندانوں کی فلاح و بہبود اور سہولت ان کا ہمیشہ سے مقصد رہا ہے۔