لوگ مہنگائی سے پریشان، وزیر اعظم وصولی میں مصروف: راہل گاندھی

نئی دہلی: کانگریس کے سابق صدر راہل گاندھی نے کہا کہ عوام مہنگائی سے پریشان ہیں لیکن وزیر اعظم نریندر مودی دنیا میں تیل کی قیمتوں میں کمی کے باوجود ملک کے عوام کو راحت دینے کے لیے اقدامات نہیں کر رہے ہیں۔

کانگریس کے لیڈر نے کہا کہ گزشتہ چھ ماہ کے دوران بین الاقوامی منڈی میں خام تیل کی قیمت میں ایک چوتھائی کمی آئی ہے اور خام تیل کی قیمت میں کمی سے پوری دنیا راحت محسوس کر رہی ہے، لیکن مودی سرکار نے اس کا ملک کے عوام کو کوئی فائدہ نہیں دیا۔ خام تیل کی قیمت میں کمی کے باوجود حکومت نے تیل کی قیمت میں ایک روپے کی بھی کمی نہیں کی۔

راہل گاندھی نے ٹوئٹ کیا ’’گزشتہ چھ مہینوں میں خام تیل 25 فیصد سے زیادہ سستا ہوا ہے۔ ملک میں پٹرول اور ڈیزل کے دام 10 روپے سے زیادہ گھٹائے جا سکتے ہیں لیکن حکومت نے ایک روپے بھی کم نہیں کیا۔ ہندوستان کے عوام مہنگائی سے ترست (پریشان) ہیں، وزیراعظم اپنی وصولی میں مست ہیں۔‘‘

خیال رہے کہ دہلی میں پٹرول کے دام 96.72 روپے فی لیٹر ہیں اور ڈیزل کے دام 86.67 روپے فی لیٹر ہیں۔ ملک بھر میں گزشتہ کئی ماہ سے پٹرول اور ڈیزل کے داموں میں کوئی تبدیلی نہیں کی گئی ہے۔ گزشتہ دنوں خام تیل کی قیمتوں میں کمی کے بعد قیاس آرائیاں شروع ہو گئی ہیں کہ ڈیزل-پٹرول کی قیمتوں میں کمی ہو سکتی ہے، حالانکہ تیل کی قیمتوں میں کمی نہیں کی گئی ہے۔

(یو این آئی ان پٹ کے ساتھ)