جموں کے لوگوں نے بھلے ہی بی جے پی کو ووٹ دیا، لیکن حکومت سب کے لیے کام کرے گی: عمر عبداللہ

جموں و کشمیر اسمبلی انتخاب میں انڈیا اتحاد نے بڑی جیت حاصل کی ہے۔ مرکز کے زیر انتظام اس خطہ میں نیشنل کانفرنس نے سب سے زیادہ 42 سیٹوں پر کامیابی حاصل کی اور اب عمر عبداللہ کی قیادت میں حکومت سازی کی تیاریاں چل رہی ہیں۔ اس درمیان بدھ کے روز عمر عبداللہ نے میڈیا سے کہا کہ ’’ہم لیفٹیننٹ گورنر صاحب سے ملاقات کریں گے۔ اس کے بعد حلف برداری ہوگی۔‘‘

جموں علاقہ میں بی جے پی کو کثیر ووٹ ملنے سے متعلق ایک سوال کا جواب دیتے ہوئے نیشنل کانفرنس کے نائب صدر عمر عبداللہ نے کہا کہ ’’ہم چاہتے ہیں امن کے ماحول میں مل کر لوگوں کی خدمت کریں۔ ایسا نہیں ہے کہ جہاں جہاں ہمیں ووٹ نہیں دیا گیا ہم انھیں بھول جائیں۔‘‘ ان کا کہنا ہے کہ 80 فیصد لوگوں نے جموں میں بی جے پی کو ووٹ دیا ہے، اس کا مطلب یہ نہیں کہ ہم انھیں فراموش کر دیں۔ ان کو بھی اتنی ہی فائدہ ملے گا جتنا 20 فیصد کو ملے گا۔

عمر عبداللہ نے انتخابی منشور میں کیے گئے ’ریاستی درجہ‘ سے متعلق وعدے پر بھی اپنا نظریہ بیان کیا۔ انھوں نے کہا کہ نیشنل کانفرنس اور کانگریس حکومت کابینہ کی پہلی میٹنگ میں جموں و کشمیر کا ریاستی درجہ بحال کیے جانے کا مطالبہ کرنے والا قرارداد پاس کرے گی۔ اس کے بعد یہ قرارداد وزیر اعظم نریندر مودی کے پاس بھیجا جائے گا۔