’اقتدار پر قابض لوگوں نے 5 سال تک مذہبی منافرت پھیلا کر لوگوں کو تقسیم کیا‘ جینت چودھری کا خط ووٹروں کے نام

لکھنؤ: راشٹریہ لوک دل (آر ایل ڈی) کے صدر جینت چودھری نے ریاست کے ووٹروں کے نام ایک خط جاری کیا ہے۔ اس خط کے ذریعے انہوں نے یوگی حکومت پر سخت حملہ بولا ہے۔ جینت چودھری نے کہا کہ اقتدار پر قابض لوگوں کی بد نیتی اور ناقص حکمرانی کے سبب گزشتہ 5 سال عوام مخالف رہے، حکمرانوں نے سماجی منافرت، ذات پات اور مذہبی انتشار پھیلا کر عوام کو تقسیم کرنے کا کام کیا ہے۔

خط کے ذریعے جینت نے کسانوں کے مسئلہ پر کہا کہ جب بھی کسان پر بڑھتے بوجھ کے خلاف آواز اٹھائی گئی ہے، انہیں کچلنے کی کوشش کی گئی۔ ان 5 سالوں میں دلتوں پر مظالم اور خواتین پر استحصال بھی سوالوں کی زد میں ہیں۔ ایسے میں آج کی ذمہ داریوں کی تکمیل میں آپ کی شرکت بھی میرے لیے بہت اہم ہے۔

اس سے پہلے جمعہ کے روز ایس پی سربراہ اکھلیش یادو، جنہوں نے اتر پردیش کے انتخابات کے لیے جینت چودھری کی پارٹی کے ساتھ اتحاد کیا ہے، تمام پارٹیوں اور عوام کو اہم سیاسی پیغام دیا۔ انہوں نے کہا کہ ان کا اتحاد کسانوں کے مفاد والا اتحاد ہے۔ انہوں نے کہا کہ اس بار دو کسانوں کے بیٹے اکٹھے ہوئے ہیں تو ایسے میں بی جے پی کا صفایا ہونا یقینی ہے۔

پریس کانفرنس میں جینت چودھری نے بھی بی جے پی کو نشانہ بنایا۔ انہوں نے کہا کہ مغربی یوپی میں صرف جاٹ ووٹر ہی اہم نہیں ہیں۔ بی جے پی وہاں کے سماج کے لوگوں کو تقسیم کرنے کا کام کر رہی ہے۔ اصل مسائل پر کوئی بحث نہیں رہی، صرف 80 بمقابلہ 20 فیصد کی بات کی جا رہی ہے۔ جینت نے واضح کیا کہ وہ بی جے پی اور امت شاہ کی پیشکش پر کوئی توجہ نہیں دیتے۔