مغربی بنگال میں کورونا وائرس کی نئی شکل ظاہر ہونے سے تشویش

کولکاتا: جلد کی بیماریوں کے ڈاکٹروں نے متنبہ کیا ہے کہ حالیہ دنوں میں جلد کے ایسے مریض سامنے آئے ہیں جن میں کورونا وائرس کے علامات نہیں تھے مگر جانچ کے بعد معلوم ہوا کہ یہ لوگ کورونا وائرس سے متاثر ہیں۔ ڈاکٹروں نے کہا کہ اس سے معلوم ہوتا ہے کہ کورونا وائرس اپنی شکل بدل رہا ہے۔

کورونا وائرس کی علامات کی نئی شکل ظاہر ہونے پر کلکتہ میں تشویش پائی جاتی ہے۔ ڈاکٹروں نے بتایا کہ جلد پر خارش یا پھر ہاتھ اور پیر کے انگلیوں پر خارش زدگان کی متعدد جانچ کے بعد معلوم ہوا کہ وہ تو کورونا وائرس سے متاثر ہیں جب کہ ان لوگوں کو کھانسی، بخار اور سانس کی کوئی تکلیف نہیں تھی۔

خود وزارت صحت نے کورونا کی متعدد نئی علامات کے بارے میں رہنما خطوط جاری کرتے ہوئے کہا ہے کورونا وائرس آہستہ آہستہ اپنے کردار کو تبدیل کررہا ہے۔ اب تک بخار، سانس کی تکلیف اور گلے کی تکلیف کو کوورونا وائرس کی علامت سمجھا جاتا تھا۔

اس وقت کولکاتا شہر میں کچھ ایسے لوگ کورونا پوزیٹیو پائے گئے ہیں جن میں بخار،کھانسی یا سانس کی دشواری کی کوئی علامت نہیں تھی۔ مگر جسم پر خارش کے نشانات ،انگلیوں پر چھوٹے چھوٹے زخم دیکھے گئے۔ خارش کی شکایت والے ان مریضوں کا جب کورونا ٹسٹ کرایا گیا تھا تو رپورٹ مثبت آئی۔ کلکتہ سمیت ریاست کے کئی حصوں میں کورونا سے متاثرہ لوگوں میں جلد کی شکایت کی اطلاع ملی ہے۔ ڈاکٹروں نے کہا ہے کہ اگر آپ کو اچانک جسم کے کسی بھی حصے پر خارش کی شکایت ہونے لگے تو احتیا ط شروع کردیں اورڈاکٹروں سے رجوع کریں۔