’سفر میں دھوپ تو ہوگی، جو چل سکو تو چلو‘، اپنے خلاف کارروائی پر پون کھیڑا نے اختیار کیا شاعرانہ انداز

کانگریس ترجمان پون کھیڑا کو آج صبح دہلی سے رائے پور جاتے وقت پولیس نے گرفتار کر لیا تھا، جس کے خلاف کانگریس سپریم کورٹ پہنچ گئی۔ عدالت عظمیٰ نے پون کھیڑا کو راحت پہنچاتے ہوئے ذیلی عدالت کو ہدایت دی کہ وہ عبوری ضمانت دے۔ اس کے بعد دہلی کے دوارکا کورٹ نے انھیں ضمانت دے دی۔ بعد ازاں پون کھیڑا نے اپنے آفیشیل ٹوئٹر ہینڈل سے شاعرانہ انداز میں پولیس کارروائی پر رد عمل ظاہر کیا۔ انھوں نے لکھا ’’سفر میں دھو تو ہوگی، جو چل سکو تو چلو۔‘‘

اس سے قبل پون کھیڑا نے عدالت سے ضمانت ملنے کے بعد اپنے خلاف ہوئی کارروائی کی سخت تنقید بھی کی۔ انھوں نے کہا کہ سچ کے لیے کئی بار جدوجہد کرنی پڑتی ہے اور یہ جدوجہد میں بھی کر رہا ہوں، اور میرے لیڈر راہل گاندھی بھی کر رہے ہیں۔ پون کھیڑا نے مزید کہا کہ ’’بغیر ایف آئی آر کی کاپی اور نوٹس دیے ہوائی جہاز سے مجھے گرفتار کر لیا گیا۔ لیکن عدالت پر مجھے پورا بھروسہ ہے۔‘‘

پون کھیڑا کا کہنا ہے کہ ’’مجھے غیر قانونی طریقے سے گرفتار کیا گیا، لیکن عدلیہ پر مجھے پورا اعتبار ہے جس کی وجہ سے آج میری آزادی کی حفاظت ہوئی۔ آئینی اقدار کو بچانے کے لیے راہل گاندھی جس بے خوفی کے ساتھ جدوجہد کر رہے ہیں، میں اس میں ایڑی چوٹی کا زور لگاؤں گا۔‘‘

واضح رہے کہ سپریم کورٹ نے پون کھیڑا کے خلاف درج ایف آئی آر کو ایک جگہ منتقل کرنے سے متعلق یوپی اور آسام حکومت کو نوٹس جاری کر جواب مانگا ہے۔ ساتھ ہی کہا کہ مجسٹریٹ انھیں (پون کھیڑا کو) عبوری ضمانت دیں۔ یہ حکم 27 فروری تک نافذ رہے گا۔ دراصل عدالت نے اس معاملے کی آئندہ سماعت کے لیے 27 فرروی کی تاریخ مقرر کی ہے۔