سری نگر سے شارجہ کی پرواز میں مسئلہ، پاکستان نے اپنے ائیراسپیس کے استعمال پر لگائی روک

پاکستان کی بوکھلاہٹ ایک بار پھر سامنے آئی ہے۔ جانکاری کے مطابق سری نگر سے شارجہ کے درمیان شروع ہوئی فلائٹ کو پاکستان نے اپنے ائیراسپیس سے پرواز بھرنے پر روک لگا دی ہے۔ خبروں کی مانیں تو پاکستان نے منگل کو سری نگر سے شارجہ جا رہی فلائٹ کو اپنا ائیراسپیس کا استعمال کرنے سے روک دیا، جس کے بعد فلائٹ کو گھوم کر شارجہ جانا پڑا۔

ایسا پہلی بار نہیں ہے جب پاکستان نے اس طرح کی حرکت کی ہو۔ اس سے پہلے بھی پاکستان نے کشمیر سے پرواز بھرنے والی بین الاقوامی پروازوں کو اپنا ائیراسپیس استعمال کرنے سے روک دیا تھا۔ پاکستان کی جانب سے ائیراسپیس کا استعمال نہیں کرنے دینے پر جموں و کشمیر کے سابق وزیر اعلیٰ عمر عبداللہ نے اسے افسوسناک بتایا ہے۔ انھوں نے اپنے ٹوئٹ میں لکھا ہے ’’بے حد ہی افسوسناک۔ 10-2009 میں بھی سری نگر سے دبئی جانے والی ائیر انڈیا ایکسپریس کے ساتھ پاکستان نے ایسا ہی کیا تھا۔ مجھے امید تھی کہ گو فرسٹ ائیر کے طیارے کو ائیراسپیس کے استعمال کی منظوری دینا رشتوں میں بہتری کے اشارے تھے، لیکن افسوس ایسا نہیں ہونا تھا۔‘‘

غور طلب ہے کہ امت شاہ نے 23 اکتوبر کو سری نگر-شارجہ فلائٹ کو ہری جھنڈی دکھائی تھی۔ یہ فلائٹ ’گو فرسٹ ائیر‘ نے شروع کی ہے۔ گو فرسٹ ائیر سری نگر سے شارجہ تک براہ راست بین الاقوامی پرواز اور بین الاقوامی کارگو شروع کرنے والی پہلی ائیرلائن ہے۔ گو فرسٹ سری نگر اور شارجہ کے درمیان ایک ہفتہ میں چار فلائٹس روانہ کرے گی۔