وِنگ کمانڈر ابھینندن کو آزاد کرنے کے لیے پاکستان نے رکھی شرط

ہندوستان اور پاکستان کے درمیان حالات لگاتار کشیدہ ہوتے جا رہے ہیں اور پاکستان کے ذریعہ جنگ بندی کی خلاف ورزی کے معاملے بھی لگاتار سامنے آ رہے ہیں۔ اس درمیان بدھ کے روز ہندوستان کے تباہ مگ-21 جنگی طیارہ کے گرفتار پائلٹ وِنگ کمانڈر ابھینندن ورتمان کی آزادی کےامکانات نظر آنے لگے ہیں۔ دراصل پاکستان ابھینندن ورتمان کو آزاد کرنے کے لیے تیار ہو گیا ہے لیکن یہ آزادی مشروط ہوگی۔

ذرائع کے مطابق پاکستان کے وزیر خارجہ شاہ محمود قریشی نے پاکستانی میڈیا کو بیان دیا ہے کہ وہ حالات کے معمول پر آنے کا انتظار کر رہے ہیں اور جیسے ہی ماحول سے کشیدگی ختم ہوگی انڈین پائلٹ ابھینندن کو ہندوستان کے حوالے کرنے سے متعلق غور کیا جائے گا۔ ساتھ ہی انھوں نے یہ بھی کہا کہ ہندوستانی پائلٹ کو پاکستان میں کوئی تکلیف نہیں ہوگی اور ان کا خاص خیال رکھا جائے گا۔

دوسری طرف ہندوستان میں ابھینندن کو بحفاظت وطن واپس لانے کے لیے لوگوں کا مطالبہ لگاتار بڑھتا جا رہا ہے۔ اپوزیشن پارٹیوں کے لیڈران تو مودی حکومت سے ابھینندن کی رہائی کے لیے قدم اٹھانے کی بات کہہ ہی رہے ہیں، بالی ووڈ ہستیوں نے بھی بڑی تعداد میں ان کی وطن واپسی کے لیے دعائیں کیں۔ کئی اداکاروں نے ان کی بہادری کو سلام کیا تو کئی نے امید ظاہر کی کہ وہ بہت جلد ہندوستان واپس آئیں گے۔