’ٹیکس ٹیرر‘ نے لی کیفے کافی ڈے کے مالک سدھارتھ کی جان، لاش نیتراوتی ندی سے برآمد

’کیفے کافی ڈے‘ کے مالک وی جی سدھارتھ پیر کی شب سے غائب تھے اور 36 گھنٹے بعد ان کی لاش پولس نے برآمد کر لی ہے۔ خبروں کے مطابق سدھارتھ کی لاش کرناٹک کے منگلورو میں نیتراوتی ندی کے کنارے تیرتی ہوئی نظر آئی جسے مقامی مچھواروں نے دیکھا اور اسے باہر نکالا۔

منگلورو کے پولس کمشنر سندیپ پاٹل کا کہنا ہے کہ ’’سدھارتھ کی لاش بدھ کی صبح 6 بجے ہوئیگ بازار کے پاس برآمد ہوئی ہے۔ لاش یہاں نیتراوتی ندی کے کنارے تیرتی ہوئی نظر آئی جسے مچھوارےنکال کر باہر لائے۔‘‘ پولس کمشنر نے بتایا کہ وہ سدھارتھ کے گھر والوں کا انتظار کر رہے ہیں تاکہ وہ آ کر لاش کی شناخت کریں اور آگے کی کارروائی کی جا سکے۔

غور طلب ہے کہ سدھارتھ کے ڈرائیور نے پہلے ہی بتایا تھا کہ سدھارت اُلال شہر میں واقع پل تک گھومنے کے لیے آئے تھے۔ وہاں انھوں نے پیر کی شب کار رکوائی اور پیدل ہی نکل گئے۔ ڈرائیور کا کہنا ہے کہ ’’میں ان کا انتظار کر رہا تھا۔ 90 منٹ تک وہ واپس نہیں آئے تو پولس کو خبر دی۔‘‘ سدھارتھ کے لاپتہ ہونے کے بعد ان کا ایک خط سامنے آیا تھا جس میں انھوں نے انکم ٹیکس محکمہ پر ظلم کا الزام عائد کیا تھا۔

سدھارتھ نے اس خط میں لکھا ہے کہ ’’ایک سابق ڈی جی نے مائنڈ ٹری کے ساتھ معاہدہ بلاک کرنے کے لیے ان کے شیئرس کو دو بار اٹیچ کیا، جب کہ ترمیم شدہ ریٹرنس ان کی جانب سے فائل کیے جا چکے تھے۔‘‘ سدھارتھ نے آئی ٹی محکمہ کی اس کارروائی کو نامناسب بتایا ہے اور لکھا ہے کہ ’’اس کی وجہ سے پیسے کی کمی ہو گئی تھی۔‘‘

سدھارتھ نے اس خط میں مزید لکھا ہے کہ ’’میں اپنے سرمایہ کاروں اور کمپنی کے بورڈ آف ڈائریکٹرس سے معافی مانگتا ہوں اور میں اب سرینڈر کرتا ہوں۔‘‘ انھوں نے کہا کہ 37 سال کی جدوجہد سے اپنی کمپنیوں میں 30 ہزار ملازمتیں نکالیں۔ لیکن اپنی تمام کوششوں کے باوجود ان کمپنیوں کو فائدہ کا بزنس بنانے میں ناکام رہا۔‘‘ انھوں نے آگے لکھا کہ ’’مجھ پر قرض دہندگان کا بہت زیادہ دباؤ ہے اور کسی کو دھوکہ دینا مقصد کبھی نہیں رہا، لیکن ایک صنعت کار کے طور پر میں ناکام رہا۔‘‘

منگلورو پولس نے وی جی سدھارتھ کے فون کی جانچ کے بعد ایک انکشاف یہ بھی کیا ہے کہ 10 دنوں کے اندر وی جی سدھارتھ کے پاس انکم ٹیکس کی درجنوں کال آئی تھیں۔ اس سے اشارہ مل رہا ہے کہ کیفے کافی ڈے کے مالک سدھارتھ کی جان ’ٹیکس ٹیرر‘ نے لی ہے۔