ممبئی کے باندرہ ٹرمینس پر بھیڑ ہوئی بے قابو، بھگدڑ میں 9 مسافر زخمی، 2 کی حالت نازک

 ممبئی کے باندرہ ٹرمینس پر ہفتہ اور اتوار کی درمیانی رات بھگدڑ مچ گئی۔ اس بھگدڑ میں 9 مسافر کے زخمی ہوںے کی خبر ہے جس میں 2 کی حالت سنگین بتائی جا رہی ہے۔ یہ واقعہ دیر رات 2 سے 3 بجے کا بتایا جاتا ہے۔ ممبئی سے گورکھپور جانے والی ٹرین جب پلیٹ فارم پر پہنچی تو وہاں پر لوگوں کی کافی بھیڑ تھی۔ پولیس بھی اس بھیڑ کو قابو کرنے میں ناکام رہی۔ لوگ ٹرین میں چڑھنے کی جلد بازی کرنے لگے، جس سے کچھ  گر پڑے اور پھر بھگدڑ مچ گئی۔ اس حادثہ میں زخمی ہوئے لوگوں کو علاج کے لیے بھابھا اسپتال میں داخل کرایا گیا ہے۔

یہ حادثہ باندرہ ٹرمینس کے پلیٹ فارم نمبر-1 پر پیش آیا۔ ٹرین نمبر 22921، باندرہ گورکھپور ایکسپریس ٹرین کے نکلنے کا وقت صبح 5.10 بجے تھا، لیکن ٹرین پلیٹ فارم پر2.55  بجے آکر لگ گئی۔ ایسے میں مسافر جلدی سے ٹرین میں چڑھنے کی کوشش کرنے لگے اور اسی وجہ سے بھگدڑ مچ گئی۔

ابھی تہوار کا موسم چل رہا ہے اور دیوالی آنے والی ہے ایسے میں ریلوے اسٹیشنوں پر لوگوں کی بھیڑ ہونا عام سی بات ہے۔ بھیڑ کے سبب ہمیشہ اس طرح کے واقعات کا خدشہ بنا رہتا ہے۔ واضح ہو کہ ممبئی میں کام کرنے والے لوگ بڑی تعداد میں دیوالی کے موقع پر اپنے گھر آتے ہیں۔ ان میں زیادہ تر لوگ اتر پردیش اور بہار کے باشندے ہوتے ہیں۔ اسی وجہ سے گورکھپور کی ٹرین میں چڑھنے کے لیے لوگوں کی بھیڑ جمع ہو گئی تھی جو بے قابو ہو گئی اور بھگدڑ مچ گئی جس میں کئی لوگ زخمی ہو گئے۔