آسکر فرنانڈیز مزدوروں اور پسماندہ طبقات کے مسیحا تھے: سونیا گاندھی

نئی دہلی: کانگریس صدر سونیا گاندھی نے پیر کو پارٹی کے سینئر لیڈر اور سابق مرکزی وزیر آسکر فرنانڈیز کے انتقال پر تعزیت کرتے ہوئے کہا کہ ’’فرنانڈیز مزدوروں اور پسماندہ طبقوں کے مسیحا تھے۔‘‘ اپنے تعزیتی پیغام میں انھوں نے کہا کہ’’تجربہ کار رکن پارلیمنٹ فرنانڈیز دلی طور سے کانگریس کے رکن تھے اور وہ ہر سطح پر تنظیم کو مضبوط بنانے کے لیے وقف تھے۔‘‘

کانگریس صدر نے بتایا کہ فرنانڈیز اتنے حساس مرکزی وزیر تھے جو ہمیشہ مزدوروں اور پسماندہ طبقات کے مفادات کو اہم سمجھتے تھے۔ ان کی سادگی، دیانتداری، عاجزی اور عوامی زندگی میں ان کی مہذب شخصیت سب کے لیے ایک تحریک ہے۔ سونیا گاندھی نے فرنانڈیز کی موت کو ملک اور پارٹی کے ہر کارکن کے لیے ایک بڑا نقصان قرار دیا۔ اپنے پیغام میں انھوں نے آسکر فرنانڈیز کے خاندان، ان کے قریبی لوگوں اور حامیوں سے تعزیت کا اظہار کیا ہے۔