صوبہ اتر پردیش کی ترقی کانگریس ہی کر سکتی ہے: وویک بنسل

علی گڑھ: کانگریس کے سینئر لیڈر اور کول حلقہ سے کانگریس امیدوار وویک بنسل نے ایک پریس کانفرنس سے خطاب کرتے ہوئے کہا کہ ملک میں کانگریس ہی وہ واحد سیاسی جماعت ہے جو ملک اور صوبہ کو بغیر کسی تفریق کے ترقی و خوشحالی دے سکتی ہے اور سماج میں استحکام پیدا کر سکتی ہے۔ انہوں نے کانگریس کی جنرل سکریٹری پرینکا گاندھی کی تعریف کرتے ہوئے کہا کہ جس طرح سے انہوں نے ترقیاتی پروگرام کی خاکہ بندی کی ہے وہی عوام کی فلاح و بہبود کے لیے ایک مضبوط قدم ہے۔

بے جے پی کی موجودہ حکومت کے تعلق سے پوچھے گئے ایک سوال کے جواب میں وویک بنسل نے کہا کہ بی جے پی نے جس طرح کی سیاست ملک میں کی ہے، سماج کے ہر طبقہ کے لیے خطرناک ہے اور اس سے ملک کا وقار دنیا بھر میں مجروح ہوا ہے۔ ملک ان کی اس نفرت بھری سیاست کو کبھی قبول نہیں کرے گا۔ انہوں نے بتایا کہ پرینکا گاندھی نے عوامی مفاد اور ملک کی آدھی آبادی (خواتین) کے لئے جس طرح سے 40 فیصد ریزرویشن اسمبلی انتخابات میں خواتین کو دی ہے اور نوجوان بچیوں کی مفت تعلیم و دیگر سہولیات و بے روزگار نوجوانوں کو 20 لاکھ روزگار دینے کا وعدہ اپنے انتخابی منشور میں کیا ہے وہ کر کے دکھائیں گے۔

وویک بنسل نے بات چیت کے دوران کہا کہ کانگریس کبھی بھی بی جے پی کی طرح جھوٹے وعدے نہیں کرتی ہے۔ مرکز میں مودی حکومت کے دوبارہ آنے کے ایک سوال کے جواب میں انھوں نے کہا کہ یہ ملک معصوم اور سچے لوگوں کا ہے اس لئے بھولے اور سچے عوام بی جے پی کے جھوٹ اور فریب میں آ گئے لیکن اب عوام بی جے پی کی فریب کو سمجھ چکے ہیں اور بی جے پی سے دامن چھڑانا چاہتے ہیں۔ انہوں نے کہا کہ جس طرح سے رام مندر کے نام پر وصول کئے گئے چندے کو بی جے پی اور ان کی ہم نوا جماعتوں نے خرد برد کیا اس کو پورے ملک نے دیکھا ہے۔ اسی طرح سے کورونا کے نام پر پی ایم کیئر فنڈ کے نام سے جس طرح سے پرائیویٹ ٹرسٹ بنا کر عوام سے چندے کی وصولیابی کی گئی اور اس کا استعمال اپنے ذاتی مفادات کی حصولیابی کے لیے کیا گیا، وہ بھی کسی سے پوشیدہ نہیں۔