آندھرا پردیش: گنٹور کے سرکاری اسپتال میں ایک شخص کی موت، ڈاکٹروں میں خوف

آندھرا پردیش کے ضلع گنٹور کے سرکاری اسپتال میں ایک شخص کی موت نے ڈاکٹروں اور دیگر مریضوں میں خوف و ہراس پیدا کر دیا ہے۔ فوت ہونے والے شخص کو کورونا وائرس کی علامات پر خصوصی وارڈ میں رکھا گیا تھا جہاں اس کا علاج کیا جا رہا تھا، تاہم دل کا دورہ پڑنے سے اس کی موت ہوگئی۔

ڈاکٹرس نے فوت ہونے والے مریض کے نمونے لیب کو بھیجے ہیں تاکہ کورونا وائرس کی تصدیق کی جا سکے۔ دوسری طرف اس کی لاش کی منتقلی میں بھی کافی احتیاط برتی جا رہی ہے۔ مرنے والے شخص کا تعلق ضلع گنٹور سے ہے۔

اسپتال کے اسٹاف کے مطابق وہ گزشتہ 15 سال سے ٹی بی کے مرض کا شکار تھا اور پیر کو اس کو اسپتال لایا گیا تھا تاہم اس کی موت دل کا دورہ پڑنے سے ہو گئی۔ اس کے ارکان خاندان نے کہا کہ ان کے خاندان میں کوئی بھی بیرون ملک نہیں گیا جبکہ اسپتال کے سپرنٹنڈنٹ نے کہا کہ معاملہ کی تمام رپورٹس آنے کے بعد ہی کوئی وضاحت کی جا سکے گی۔

آندھرا پردیش میں کووڈ-19 کے 3 نئے مریضوں کی تصدیق ہونے کے بعد کل مریضوں کی تعداد بڑھ کر 8 ہو گئی ہے، جن کا علاج و معالجہ کیا جا رہا ہے۔ صوبائی حکومت نے احتیاط کے طور پر ریاست کی سرحدوں کو پہلے ہی سیل کر دیا گیا تھا جبکہ لاک ڈاؤں پر سختی سے عمل کیا جا رہا ہے۔

ادھر ملک بھر میں اب تک کورونا وائرس کے 587 کیسوں کی تصدیق ہو چکی ہے۔ 40 مریض صحتیاب ہو چکے ہیں جبکہ بقیہ 537 مریضوں کا علاج کیا جا رہا ہے۔ کورونا وائرس کی بیماری سے ملک بھر میں اب تک 11 افراد ہلاک ہو چکے ہیں۔

(یو این آئی ان پٹ کے ساتھ)