چنئی: ’کسان تحریک‘ کی حمایت میں ڈی ایم کے اتحادیوں کا یک روزہ بھوک ہڑتال

چنئی: تمل ناڈو میں حزب اختلاف دراوڑ مونیترا کزگم (ڈی ایم کے) کی زیرقیادت سیکولر پروگریسیو الائنس نے مرکزی حکومت کے ذریعہ نافذ کیے جانے والے تین زرعی قوانین کومنسوخ کرنے کے مطالبے کے لئے دہلی میں مظاہرین کسانوں کی حمایت میں جمعہ کو ایک دن کی بھوک ہڑتال کی۔

ڈی ایم کے اور اس کے اتحادیوں نے آج چنئی میں ولّوور کوٹم کے سامنے بھوک ہڑتال کی۔ ڈی ایم کے صدر ایم کے اسٹالن کی قیادت میں ان کے اتحادی کانگریس، سی پی آئی، سی پی ایم، ایم ڈی ایم کے، آئی جے کے، وی کے سی اور دیگر جماعتوں کے رہنماوں نے ایک روزہ بھوک ہڑتال کی۔ پولس نے کورونا وائرس (کووڈ-19) وباکا حوالہ دیتے ہوئے اس کی اجازت نہیں دی تھی، اس کے باوجود اس کا اہتمام کیا گیا۔

اس موقع پر اسٹالن نے قومی دارالحکومت میں کسانوں کی تحریک کا حوالہ دیتے ہوئے کہا کہ گزشتہ 20 روز سے زیادہ وقت سے احتجاج جاری ہے اور مرکز سے ان کے مطالبات پر غور کرنے اور تینوں قوانین کو واپس لینے کی اپیل کی گئی ہے۔ انہوں نے مرکزی حکومت پر الزام عائد کرتے ہوئے کہا کہ اس قانون کو کارپوریٹ کے مفاد میں لایا گیا ہے۔ انہوں نے مزید کہا کہ جب تک تینوں قوانین کو منسوخ نہیں کیا جاتا، ڈی ایم کے مسلسل مظاہرین کسانوں کے ساتھ کھڑی رہے گی۔