زرعی قوانین کی منسوخی پر کانگریس نے ہفتہ کو ملک بھر میں ’کسان وجے دیوس‘ منانے کا کیا اعلان
کانگریس نے کہا کہ کسانوں کی تحریک کو راہل گاندھی کی قیادت میں اپوزیشن کی مکمل حمایت رہی ہے، اس سے کسان تحریک کو حوصلہ ملا اور مرکزی حکومت کو کسانوں کے ستیاگرہ کے سامنے جھکنا پڑا۔
نئی دہلی: کانگریس نے زراعت سے متعلق تینوں قوانین کو منسوخ کرنے کے وزیر اعظم نریندر مودی کے اعلان کو کسانوں کی جیت قرار دیتے ہوئے کہا کہ اس تحریک کو کامیاب بنانے میں کانگریس نے اہم رول ادا کیا ہے، اس لیے پارٹی ہفتہ کو پورے ملک میں ’کسان وجے دیوس‘ منائے گی۔
کانگریس نے جمعہ کو یہاں جاری کردہ ایک بیان میں کہا کہ کسان وجے دیوس کے موقع پر پارٹی ریاستی، ضلع اور بلاک کمیٹیوں کی ریلیوں اور کسان وجے سبھا کا اہتمام کرے گی اورتحریک کے دوران شہید ہونے والے کسانوں کی یاد میں کینڈل مارچ کا اہتمام کرے گی۔ یوتھ کانگریس نے بھی آج دہلی میں کینڈل مارچ کا انعقاد کیا۔
پارٹی نے کہا کہ کسانوں کی تحریک کو کانگریس کے سابق صدر راہل گاندھی کی قیادت میں اپوزیشن کی مکمل حمایت رہی ہے۔ اس سے کسان تحریک کو حوصلہ ملا اور مرکزی حکومت کو کسانوں کے ستیاگرہ کے سامنے جھکنا پڑا۔ کسان وجے دیوس پروگرام کے دوران پارٹی کارکن شہید کسانوں کو خراج عقیدت پیش کرنے کے ساتھ ساتھ اپنے اپنے علاقوں میں تحریک میں شہید ہونے والے کسانوں کے اہل خانہ سے ملیں گے اور انہیں تسلی دیں گے۔
اس درمیان کانگریس کے سابق صدر راہل گاندھی نے کسان مزدوروں کے نام ایک خط لکھ کر کہا ہے کہ یہ ان کی تاریخی فتح ہے اور اس کے لیے وہ انہیں مبارکباد پیش کرتے ہیں۔ انہوں نے حکومت سے 2022 تک کسانوں کی آمدنی دوگنی کرنے اور کسانوں کے امور پر حکومت سے کسانوں کے معاملے میں تکبر چھوڑنے کی بھی اپیل کی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔