لاک ڈاؤن 5.0 کے پہلے ہی دن عوام کو لگا زبردست جھٹکا، رسوئی گیس کی قیمت بڑھی

کچھ دنوں پہلے ایل پی جی رسوئی گیس کی قیمتوں میں کمی سے عوام میں خوشی کا ماحول تھا، لیکن اب ایک بار پھر عوام کے لیے بری خبر سامنے آئی ہے اور وہ یہ کہ بغیر سبسیڈی والے ایل پی جی رسوئی گیس کی قیمتوں میں زبردست اضافہ کر دیا گیا ہے۔ کورونا وائرس وبا کے پھیلاؤ کو روکنے کے لیے جاری لاک ڈاؤن 5.0 کے پہلے ہی دن عوام کو یہ بری خبر سننے کو مل رہی ہے۔

خبروں کے مطابق آئل مارکیٹنگ کمپنیوں ایچ پی سی ایل، بی پی سی ایل، آئی او سی نے بغیر سبسیڈی والے ایل پی جی رسوئی گیس سلنڈر کی قیمت بڑھانے کا فیصلہ کیا ہے اور اس کے تحت 14.2 کلو گرام والے سلنڈر کی قیمت دہلی میں 11.50 روپے فی سلنڈر بڑھ گئی ہے۔ دیگر شہروں میں بھی گھریلو رسوئی گیس سلنڈر کی قیمت آج سے بڑھ گئی ہے اور کولکاتا میں یہ اضافہ 31.50 روپے، ممبئی میں 11.50 روپے اور چنئی میں 37 روپے فی سلنڈر ہوا ہے۔

قابل غور یہ ہے کہ 19 کلو گرام والے سلنڈر کی قیمت میں 110 روپے کا اضافہ کیا گیا ہے جس کی وجہ سے اس کی قیمت بڑھ کر 1139.50 روپے ہو گئی ہے۔ اس سے قبل مئی میں 14.2 کلو والے ایل پی جی سلنڈر کی قیمت میں 162.50 روپے کی کمی کی گئی تھی جس سے عوام کافی خوش تھی۔ لیکن اب پھر قیمتوں کے بڑھنے کا سلسلہ شروع ہو گیا ہے۔