دیویندر فڈنویس اتنے ڈرے ہوئے کیوں ہیں؟ کیا اسرائیل اور لیبیا حملہ کرنے والے ہیں؟ سنجے راؤت کا طنز

مہاراشٹر کے نائب وزیر اعلیٰ دیویندر فڈنویس کی سیکورٹی بڑھائے جانے پر شیو سینا (یو بی ٹی) کے لیڈر سنجے راؤت نے طنز کیا ہے۔ انہوں نے کہا کہ ریاست کے وزیر داخلہ کی سیکورٹی اچانک بڑھا دی گئی ہے۔ عام طور پر وزیر داخلہ دوسروں کو سیکورٹی فراہم کرتا ہے لیکن انہوں نے اپنی سیکورٹی بڑھا لی ہے۔ اچانک ہم نے ان کے گھر کے باہر 'فورس ون' کمانڈو کو تعینات دیکھا۔ سنجے راؤت نے سوال اٹھاتے ہوئے کہا کہ ہمارے وزیر داخلہ اتنے ڈرے ہوئے کیوں ہیں؟ کیا ان پر اسرائیل اور لیبیا حملہ کرنے والے ہیں؟

سنجے راوت نے یہ بھی کہا کہ "ہم نے دیکھا کہ ان کے گھر کے باہر کمانڈو تعینات ہیں۔ ناگپور میں ان کے گھر کے باہر 200 کمانڈو تعینات ہیں۔ ہمارے وزیر داخلہ اتنے ڈرے ہوئے کیوں ہیں؟ ان پر کون حملہ کرے گا؟ کیا اسرائیل اور لیبیا ان پر حملہ کرنے والے ہیں؟ رشمی شکلا، جو کہ بی جے پی کی ڈی جی ہیں، انہیں اس معاملے پر بتانا چاہئے۔"

قابل ذکر ہے کہ مرکزی انٹیلی جنس ایجنسیوں نے مہاراشٹر کے نائب وزیر اعلیٰ دیویندر فڈنویس کی سیکورٹی کے متعلق الرٹ جاری کیا تھا۔ جس کے بعد ان کی سیکورٹی میں اضافہ کر دیا گیا۔ ان کی سیکورٹی میں 12 'فورس ون' کے جوانوں کو تعینات کیا گیا۔ ساتھ ہی ممبئی میں ان کے سرکاری گھر، ناگپور میں ان کے آبائی گھر، ان کے پروگرام اور انتخابی اجلاس میں بھی سیکورٹی میں اضافہ کر دیا گیا ہے۔