بھارت جوڑو یاترا کے 100 دن پورے ہونے پر کانگریس صدر کھڑگے کا ویڈیو پیغام ’نفرت کے خلاف ملک کو متحد کر رہی یاترا‘

نئی دہلی: کانگریس کی ’بھارت جوڑو یاترا‘ کے آج 100 دن مکمل ہو گئے ہیں۔ اس یاترا کے دوران راہل گاندھی اور دیگر یاتریون نے 2800 کلومیٹر سے زیادہ کا فاصلہ طے کیا ہے۔ اس موقع پر کانگریس صدر ملکارجن کھڑگے نے ایک ویڈیو پیغام جاری کیا ہے۔ انہوں نے کہا کہ یہ یاترا ملک کو نفرت کے خلاف متحد کر رہی ہے۔

کانگریس صدر کھڑگے نے کہا ’’کانگریس پارٹی اور راہل گاندھی کی بھارت جوڑو یاترا نے آج ایک تاریخی مقام پر قدم رکھا ہے، آج یاترا نے 100 دن مکمل کر لئے ہیں، اس موقع پر تمام بھارت یاتریوں اور خاص طور پر راہل گاندھی کو بہت بہت مبارک ہو۔ یاترا کو لاکھوں لوگوں کی حمایت، تعاون اور اعتماد حاصل ہوا ہے۔‘‘

انہوں نے کہا ’’بھارت جوڑو یاترا میں ہم نوجوانوں، کسانوں، خواتین اور زندگی کے ہر شعبہ سے تعلق رکھنے والے لوگوں سے بات چیت کر رہے ہیں۔ بھارت جوڑو یاترا اہم طور پر تین معاملوں پر ملک کو متحد کر رہی ہے۔ پہلا سماج میں جو نفرت پھیلائی جا رہی ہے اور ایس سی، ایس ٹی، او بی سی اور اقلیتوں پر لگاتار حملے بڑھ رہے ہیں۔ کانگریس پارٹی ان ظلم و ستم کے خلاف آواز اٹھا رہی ہے۔‘‘

انہوں نے کہا ’’دوسرے گزشتہ 8 سالوں سے ملک خوفناک بے روزگاری اور کمر توڑ مہنگائی سے نبردآزما ہے۔ ایسے میں آپ لوگ ہمیں اپنے مشورے دے رہے ہیں تاکہ 2024 میں ہم ملک کے لئے اپنا اقتصادی ایجنڈیا تیار کر سکیں۔‘‘

کھڑگے نے مزید کہا کہ ’’ملک میں جو تاناشاہی کا دور آیا ہے اور حکومت نے اداروں کو کمزور کر دیا ہے، ہر ایک شخص اس کے خلاف آواز اٹھا رہا ہے۔ بھارت جوڑو یاترا اب ایک قومی عوامی تحریک بن گئی ہے اور ہمیں امید ہے کہ آئندہ سالوں میں ہم سبھی ملک کے باشندگان مل کر ہندوستان کو ایک نئی رفتار اور سمت دے پائیں گے۔‘‘