ایک طرف کانگریس ہے جس نے ملک کو جوڑا اور دوسری طرف وہ ہیں جو لوگوں کو تقسیم کرتے ہیں: راہل گاندھی

نئی دہلی: کانگریس کے انتخابی منشور پر تنقید کئے جانے کے معاملہ میں راہل گاندھی نے بی جے پی اور وزیر اعظم مودی کو جواب دیا ہے۔ راہل گاندھی نے کہا کہ ایک طرف کانگریس ہے جس نے ہمیشہ ہندوستان کو متحد کرنے کا کام کیا، جبکہ دوسری طرف وہ ہیں جنہوں نے ہمیشہ لوگوں کو تقسیم کیا۔

خیال رہے کہ بی جے پی لیڈران کانگریس کے انتخابی منشور کو ’مسلم لیگ‘ سے متاثر قرار دیا ہے۔ کانگریس نے اپنے انتخابی منشور میں وعدہ کیا ہے کہ اقلیتوں کے پرسنل قوانین کی حفاظت کی جائے گی اور اگر کسی اصلاح کی ضرورت بھی ہوگی تو اس پر عمل درآمد سے قبل متعلقہ لوگوں سے مشورہ کیا جائے گا۔

راہل گاندھی نے سوشل میڈیا پلیٹ فارم ایکس پر لکھا، ’’یہ الیکشن دو نظریات کی لڑائی ہے۔ ایک طرف کانگریس ہے، جس نے ہمیشہ ہندوستان کو متحد کیا اور دوسری طرف وہ ہیں، جنہوں نے ہمیشہ لوگوں کو تقسیم کرنے کی کوشش کی۔ تاریخ شاہد ہے، کس نے ملک کو تقسیم کرنے کی کوشش کی ہے۔ تاریخ گواہ ہے کہ کسنے ملک کی تقسیم چاہنے والی قوتوں سے ہاتھ ملا کر انہیں مضبوط کیا اور کون ملک کے اتحاد اور آزادی کے لیے لڑا۔‘‘

کانگریس کے سابق صدر نے مزید لکھا، ’’کون بھارت چھوڑو تحریک کے وقت انگریزوں کے ساتھ کھڑا تھا؟ جب ہندوستان کی جیلیں کانگریس کے لیڈران سے بھر گئی تھیں، تب کون ملک کو تقسیم کرنے والی قوتوں کے ساتھ ریاستوں میں حکومت چلا رہا تھا؟ سیاسی پلیٹ فارمز سے جھوٹ کی بوچھار کرنے سے تاریخ نہیں بدلتی۔‘‘