دہلی میں 13 نومبر سے نافذ نہیں ہوگا طاق و جفت، کیجریوال حکومت کا فیصلہ واپس

نئی دہلی: دہلی کے وزیر ماحولیات گوپال رائے نے کہا ہے کہ 13 نومبر سے طاق جفت لاگو نہیں ہوگا، فی الحال اس منصوبے کو ملتوی کر دیا گیا ہے۔ انہوں نے کہا کہ صورتحال دوبارہ سنگین ہوئی تو غور کیا جائے گا۔

گوپال رائے نے کہا کہ دہلی میں 8-10 دنوں سے ہوا کی رفتار میں استحکام ہے۔ جس کی وجہ سے آلودگی کی سطح سنگین کیٹیگری تک پہنچ گئی تھی۔ رات سے ہونے والی بارش کے بعد جو اے کیو آئی 450 تھا آج 300 ہو گیا ہے اور اس میں مزید کمی متوقع ہے۔ اگر صورتحال دوبارہ سنگین ہوتی ہے تو اس پر مزید غور کیا جائے گا۔ دیوالی کے بعد حکومت آلودگی پر ایک جائزہ میٹنگ کرے گی اور اس کے بعد فیصلہ لیا جائے گا۔

گوپال رائے نے کہا کہ طاق و جفت منصوبہ کو نافذ کرنے کا فیصلہ 20 نومبر تک ملتوی کر دیا گیا ہے۔ انہوں نے کہا کہ ہوا کی رفتار بڑھنے سے رات سے موسم بدل گیا ہے۔ آلودگی کی سطح میں بہتری دیکھی جا رہی ہے۔ اس سے پہلے، دہلی حکومت نے بدھ (8 نومبر) کو کہا تھا کہ اس کو سپریم کورٹ کے ذریعہ طاق-جفت اسکیم کی تاثیر کا جائزہ لینے کے بعد ہی نافذ کیا جائے گا۔ عدالت عظمیٰ نے منگل (7 نومبر) کو گاڑیوں کی آلودگی کو روکنے کے مقصد سے اس اسکیم کی تاثیر پر سوال اٹھایا تھا۔

گوپال رائے نے کہا تھا کہ اس اسکیم کو لاگو کرنے کے بارے میں فیصلہ سپریم کورٹ کے اس کی تاثیر کا جائزہ لینے اور احکامات جاری کرنے کے بعد ہی لیا جائے گا۔ انہوں نے بتایا تھا کہ کیس کی اگلی سماعت جمعہ (10 نومبر) کو ہوگی۔ یہ اسکیم سال 2016 میں دہلی میں ہوا کا معیار خراب ہونے کے بعد شروع کی گئی تھی۔ اس کے تحت کاروں کو اوڈ ایون نمبر پلیٹس کی بنیاد پر متبادل دنوں میں چلنے کی اجازت دی جاتی ہے۔