امت شاہ کی ریلی کے لیے جمع کریں بھیڑ، دادرا-نگر حویلی کی فیکٹریوں کو نوٹس!

مرکزی وزارت داخلہ امت شاہ کی ریلی کے لیے دادرا اور نگر حویلی انتظامیہ نے سبھی سرکاری محکموں کو حکم دیا ہے کہ اس ریلی کے لیے بڑی تعداد میں بھیڑ جمع کرنی ہے اور اس کے لیے فیکٹری مزدوروں کو ریلی میں لایا جائے۔ اس مرکز کے ماتحت ریاست میں امت شاہ کی ریلی یکم ستمبر یعنی پیر کے روز ہونی ہے۔

سکریٹری کلکٹر برائے صنعت اور ڈپٹی لیبر کمشنر کو ڈائریکٹر برائے صنعت کرن جیت وڈوداریا کی طرف سے بھیجے گئے نوٹس میں کہا گیا ہے کہ ریلی میں زیادہ سے زیادہ بھیڑ جمع ہو اس کے لیے اسسٹنٹ اور جونیئر انجینئروں کو نوڈل افسر بنایا گیا ہے۔ یہ نوڈل افسر فیکٹریوں اور چھوٹی اکائیوں میں کام کرنے والے مزدوروں کو امت شاہ کی ریلی میں پہنچائے جانے کے انتظام پر نظر رکھیں گے۔

نوٹس میں ڈائریکٹر نے کئی افسروں کے نام لکھے ہیں جو مختلف صنعتی یونٹوں کے نمائندوں کے ساتھ کو آرڈینیٹ کریں گے اور ان کے ذریعہ بھیجے گئے مزدوروں اور گاڑیوں وغیرہ کو ویریفائی کریں گے۔ ان افسران کو امت شاہ کی ریلی میں مزدوروں کے پہنچنے کے مکمل انتظام کی ہدایت دی گئی ہے۔ ذرائع کا کہنا ہے کہ اس ریلی میں بھیڑ جمع کرنے میں مصروف انتظامیہ اس حد تک ہڑبڑی میں ہے کہ نوٹس میں ایک غلطی بھی نشان زد ہو گئی ہے۔ نوٹس میں کہا گیا ہے کہ مزدوروں کو ریلی کی جگہ تک پہنچانے کے لیے تحریری جانکاری 16 جنوری 2019 تک جمع کی جائے۔

غور طلب ہے کہ وزیر اعظم نریندر مودی نے 19 جنوری 2019 کو دادرا اور نگر حویلی میں ریلی کی تھی۔ غالباً یہ نوٹس اسی وقت کا ہے جسے اب امت شاہ کی ریلی کے لیے استعمال کیا جا رہا ہے اور جلد بازی میں تاریخ بدلنا چھوٹ گیا ہے۔ اس سے یہ بھی واضح ہوتا ہے کہ اس مرکز کے ماتحت ریاست میں اس طرح کی کوشش معمول کی بات ہے۔

اتنا ہی نہیں، ذرائع کے مطابق امت شاہ کی ریلی کے دن صنعتی یونٹوں کی بجلی بند کر دی جائے گی تاکہ اگر کوئی فیکٹری والا چاہے بھی تو مزدوروں کو نہ بھیجنے کے باوجود اس کے یہاں کام بند رہے۔ ایسے میں فیکٹری مالکوں کے پاس مزدوروں کو ریلی میں بھیجنے کے علاوہ دوسرا متبادل نہیں ہے۔

دادرا اور نگر حویلی کے صنعتی ایسو سی ایشن سے جڑے ایک ذرائع نے بتایا کہ ’’مجھے اپنے ایریا سے کم از کم 2 ہزار مزدوروں کو ریلی کے لیے بھیجنا ہے۔ امت شاہ کی ریلی 11.30 بجے ہے، ایسے میں ہم عام طور پر دوسری اور تیسری شفٹ کے مزدوروں کو ریلی کے لیے بھیجتے ہیں۔ ان کے لیے پانی اور کھانے کا انتظام بھی ہمیں کرنا پڑتا ہے۔ ہمیں صاف کہا گیا ہے کہ کم از کم اتنے مزدور تو آنے ہی چاہئیں۔‘‘

فیکٹری مالکوں کو نہ صرف ریلی کے لیے بھیجے جانے والے مزدوروں کی تعداد بتانی ہے بلکہ ان کے لیے پانی اور کھانے کا انتظام بھی کرنا ہے، وہیں اس کام کے لیے تعینات افسران کو بھی یقینی کرنا ہے کہ اتنے مزدور ریلی کے لیے ہر حال میں پہنچے۔