’بھارت رتن سے کچھ نہیں ہوگا، کسانوں کے مسائل حل کرنے ہوں گے‘، نریش ٹکیت نے مودی حکومت کو کیا متنبہ

مظفر نگر: ’بھارتیہ کسان یونین‘ کے صدر چودھری نریش ٹکیت کا کہنا ہے کہ راشٹریہ لوک دل کے صدر جینت چودھری بی جے پی کے ساتھ گئے ہیں، اب انہیں کسانوں کے مسائل حل کرا دینا چاہئے۔ اگر وہ یہ نہیں کرا پاتے ہیں تو انہیں اس کا بھاری خمیازہ بھگتنا پڑے گا۔ حکومت بھی سمجھ لے کہ صرف بھارت رتن دینے سے کام نہیں چلے گا بلکہ کسانوں کے مسائل بھی حل کرنے ہوں گے۔

ایک نیوز ویب سائٹ سے بات کرتے ہوئے نریش ٹکیت نے کہا کہ جینت چودھری بی جے پی کے ساتھ گئے ہیں۔ اب انہیں ملک کے کسانوں کے مسائل حل کرانے کے لیے آگے آنا چاہئے۔ اگر وہ مسائل حل نہیں کراپاتے ہیں تو بات الٹی پڑ سکتی ہے۔  نریش ٹکیت نے کہا کہ ’’16 فروری کو کسان لاک ڈاؤن ہے۔ پورے ملک کا کسان ایک ہے۔ سرکار پنجاب یا ہریانہ کے کسانوں کو اکیلا سمجھنے کی بھول نہ کرے۔‘‘

سابق وزیر واعظم چودھری چرن سنگھ کو بھارت رتن دیئے جانے پر نریش ٹکیت نے کہا کہ ’’صرف بھارت رتن سے کسانوں کا کام نہیں چلے گا۔ گنے کا مسئلہ ہے، ایم ایس پی اور دیگر مسائل ہیں، انہیں حل کرنا ہوگا۔ حکومت کو یہ بھی سمجھنا چاہئے کہ کسان ہی ملک کا پیٹ بھرتے ہیں اور کسان اپنی تحریک سے پیچھے ہٹنے والے نہیں ہیں۔‘‘ انہوں نے کہا کہ ’’پورے ملک کے کسانوں کی نگاہیں دہلی پر ہیں۔‘‘