بھیا جی جوشی کی دھمکی: ایودھیا میں مندر کے علاوہ کچھ اور نہیں

چوتھی مرتبہ آر ایس ایس کےجنرل سکریٹری منتخب ہونے کے بعد بھیا جی جوشی نے اپنے بیان سے واضح کر دیا ہے کہ رام مندر کی تعمیر تو طے ہے۔ انہوں نے اپنے خطاب میں کہا کہ ’’رام مندر بننا طے ہے اور اس کی جگہ کچھ اور نہیں بن سکتا‘‘ ۔ انہوں نے کہا زمین کے مالکانہ حق کے تعلق سے فیصلہ آنے کے بعد ہی تعمیر کا عمل شروع ہوگا لیکن مندر بننا طے ہے۔ انہوں نےعدالت کے باہر اس معاملہ کو حل کرنے کی جو کوششیں ہو رہی ہیں اس کا خیر مقدم کرتے ہوئے کہا کہ ’’ہر ایسی کوشش کا سنگھ خیر مقدم کرتا ہے‘‘۔ بھیا جی جوشی کا یہ کہنا کہ اس جگہ پر مندر کے علاوہ کچھ اور نہیں بن سکتا ۔اپنے آپ میں واضح اشارہ کرتا ہے کہ عدالت کا فیصلہ کچھ بھی آئے اور کسی بھی فریق کے حق میں آئے، لیکن سنگھ تو مندر وہیں بنائے گا۔ عدالت کے باہر اس مسئلہ کو حل کرنے کی کوششوں کے تعلق سے انہوں نے کہا ’’اتفاق رائے بنتی ہے تو وہ اس کا استقبال کریں گے ،لیکن ایسا لگتا ہے کہ یہ کوششیں کامیاب نہیں ہوں گیں‘‘۔

تریپورہ انتخابات جیتنے کے بعد وہاں جو ’لینن‘ کے مجسمے توڑے جانے کی خبریں آئیں اس کی انہوں نے سخت الفاظ میں مزمت تو کی، لیکن اس کے ساتھ انہوں نے کیرالہ میں ہو رہے سیاسی قتل کے مدے کو بھی جو ڑ کر اٹھایا۔ انہوں نے ایک بڑا بیان دیتے ہوئے کہا کہ وہ ایسا نہیں مانتے کہ سال 2014میں بی جے پی سنگھ کی وجہ سے اقتدار میں آئی تھی بلکہ اس وقت حالات ہی ایسے تھے جن کی وجہ سے بی جے پی اقتدار میں آئی ۔

ادھر نیرو مودی معاملہ میں انہوں نے وہی کہا جو مرکزی حکومت کہتی رہی ہے کہ یہ گھوٹالہ سسٹم میں موجود خامیوں کی وجہ سے ہوا۔