گوری لنکیش : ’ناٹ ان مائی نیم ‘

نئی دہلی:گوری لنکیش کے قتل کے بعددہلی اور ملک کے مختلف شہروں میں بھی مظاہروں کاسلسلہ جاری ہے۔ پریس کلب آف انڈیا میں احتجاجی مظاہرہ کے دوران صحافیوں نے قاتلوں کو گرفتار کرنے اور جس نظریہ نے گوری کا قتل کیا ہے اس نظریہ پرمتحد ہو کر سامنے سے لڑنے کی اپیل کی ہے ۔ احتجاج کے اس سلسلہ کو آگے بڑھاتے ہوئے’ناٹ ان مائی نیم‘کے نام سے چلائی جا رہی مہم کے تحت بھی گزشتہ روز جنتر منتر پر ایک احتجاجی مظاہرہ کا انعقاد کیا گیا ۔’ ناٹ ان مائی نیم‘ کمپین کو شروع کرنے والی صبا دیوان کا اس موقع پر کہنا تھا کہ ملک میں جو عدم رواداری کا ماحول چل رہا ہے اسے دیکھ کر کوئی بھی عقل سلیم رکھنے والا شخص خاموش نہیں رہ سکتا۔ صبا کا کہنا تھا کہ یہ تشدد کے خلاف آواز اٹھانے کا ہی نتیجہ ہے کہ سپریم کورٹ نے مرکزی حکومت کو پھٹکار لگائی ہے اور گئو رکشا کے نام پر چل رہی غنڈہ گردی کو بند کرنے کو کہا ہے۔ ’ناٹ ان مائی نیم ‘ کے بینر تلے ہونے والے احتجاجی مظاہرہ میں مقررین نے جن جذبات کا اظہار کیا اس کو قومی آواز نے لائیو بھی دکھایا تھا اورجس کی ویڈیو درج ذیل لنک پر دیکھ سکتے ہیں۔