نتیش نے ریاست اور ملک کے لوگوں کو عیدالفطر کی مبارکباد دی

وزیر اعلیٰ نتیش کمار نے عید الفطر کے موقع پرریاست اور ملک کے لوگوں بالخصوص مسلمان بھائی اور بہنوں کو عید کی مبارکباد اور نیک خواہشات پیش کی ہیں۔ اپنے تہنیتی پیغام میں وزیر اعلیٰ نے کہا کہ رمضان المبارک کے مقدس مہینے میں روزے داروں کے ذریعہ کی جانے والی عبادت سے ان کے اہل خانہ کے ساتھ ساتھ ریاست اور ملک کے لیے امن اور خوشحالی آئے گی۔ میری دعا ہے کہ سماج میں امن، ہم آہنگی اور بھائی چارہ پورے طور پرقائم رہے۔

عید کا دن انعام کا دن ہے۔خدا اس مبارک دن پر اپنے نیک بندوں کو انعامات سے نوازتے ہیں۔ خدا ہم سب پر اپنی ر حمتوں کی بارش کرے اور ہم سب کی زندگی خوشی اور امن و سلامتی سے بھری رہے ۔

وزیر اعلیٰ نے کہا کہ ہندوستان ایک عظیم ملک ہے۔ یہاں مختلف مذاہب، فرقوں اورعقیدت مندوں کے درمیان باہمی ہم آہنگی، محبت اور رواداری بے مثال ہے۔ یہاں تمام لوگ ایک دوسرے کے تہواروں میں شریک ہوتے ہیں اور خوشیاں بانٹتے ہیں اور ایک دوسرے کے مذاہب کا احترام کرتے ہیں۔ اس سے ریاست اور ملک کو تقویت ملتی ہے۔