شراب معاملہ میں قید لوگوں کی ضمانت کرائے نتیش حکومت: جیتن رام مانجھی
ہندوستانی عوام مورچہ کے قومی صدر اور بہار کے سابق وزیراعلیٰ جیتن رام مانجھی نے ٹوئٹ کر کے وزیراعلیٰ نتیش کمار سے مطالبہ کیا ہے کہ شراب معاملہ میں جیل میں بند لوگوں کی جلد ضمانت کرائی جائے۔
پٹنہ: بہار اسمبلی انتخاب سے کچھ ہی دن پہلے وزیراعلیٰ نتیش کمار کی قیادت والے حزب اقتدار جنتادل یونائٹیڈ (جے ڈی یو) کے حلیف بنے ہندوستانی عوام مورچہ ( ہم) نے شراب بندی قانون کے تحت جیل میں بند لوگوں کو چھوڑنے کا مطالبہ کر کے حکومت کی پریشانی بڑھا دی ہے۔ ہم کے قومی صدر اور بہار کے سابق وزیراعلیٰ جیتن رام مانجھی نے آج ٹوئٹ کر کے وزیراعلیٰ نتیش کمار سے یہ بڑا مطالبہ کر دیا ہے۔
جیتن رام مانجھی نے شراب بندی قانون کو سختی سے نافذ کرنے کے لئے نتیش کمار کو مبارک باد پیش کی ہے۔ ساتھ ہی درخواست کی ہے کہ ویسے غریب جو شراب بندی قانون کے تحت چھوٹی غلطی سے تین ماہ سے جیل میں بند ہیں ان کی ضمانت کا نظم یقینی کروائیں۔ کنبہ کے سرپرست کے جیل میں بند رہنے کی وجہ سے ان کے بچے بھوکے ہیں۔
واضح رہے کہ جیتن مانجھی نے تین دن قبل کہا تھا کہ اگر وہ مزید کچھ دن وزیراعلیٰ کے عہدے پر رہتے تو بے روزگاروں کے لئے 75 لاکھ کی ٹھیکداری میں ریزرویشن کا نظم نافذ کردیتے۔ ابھی تک ان کی اس تجویز کو حکومت نے نافذ نہیں کیا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔