شدید گرمی کی لہر: ہندوستان اور پاکستان میں 90 افراد ہلاک!

نئی دہلی: سال 2022 کے دوران ہیٹ ویو کے سبب ہندوستان اور پاکستان میں کم از کم 90 افراد کے ہلاک ہونے کا خدشہ ہے۔ یہ معلومات ایک تحقیق میں دی گئی ہے۔ تحقیق میں کہا گیا ہے کہ یہ تعداد سرکاری ریکارڈ سے نہیں بلکہ میڈیا رپورٹوں پر مبنی ہے۔

تحقیق کرنے والے موسمیاتی سائنس دانوں نے کہا کہ پاکستان اور ہندوستان میں شدید گرمی ان لوگوں کے لیے زیادہ مسائل کا باعث بنتی ہے جنہیں یومیہ اجرت کے لیے باہر جانا پڑتا ہے (جیسے کہ ریہڑی پٹری والے، تعمیراتی اور زرعی مزدور، ٹریفک پولیس)۔ اس کے نتیجے میں وہ گھر کے اندر بجلی سے آنے والی ٹھنڈک سے دور رہتے ہیں اور گرمی سے نمٹنے کے ان کے طریقے محدود ہو جاتے ہیں۔

تاہم، جب ان اعداد کے ماخذ کے بارے میں پوچھا گیا تو ہالینڈ کے شہر ہیگ میں ریڈ کراس ریڈ کریسنٹ کلائمیٹ سینٹر کے سائنسدانوں میں سے ایک ادیتی کپور نے کہا کہ یہ تحقیق میڈیا رپورٹس پر مبنی ہیں اور اس پر ابھی تک کوئی سرکاری ریکارڈ موجود نہیں ہیں اور بہت سے معاملات میں موت کی وجہ کے طور پر ہیٹ اسٹروک کا براہ راست کوئی ذکر نہیں ہے۔ سائنسدانوں کی کثیر تصنیف ٹیم نے کہا کہ زندگی اور معاش کے نقصان سے بچنے کے لیے گرمی میں مزید کمی ضروری ہے۔