’سرکاری ملازمین کے ساتھ دھوکہ دہی بند کیجئے‘ نیہا سنگھ راٹھور کا یو پی ایس پر طنز

مرکز کی مودی حکومت نے سرکاری ملازمین کے لیے ایک نئی پنشن اسکیم، یونیفائیڈ پنشن اسکیم (یو پی ایس) کا اعلان کیا ہے۔ سرکاری ملازمین کے لیے یو پی ایس متعارف کرایا گیا ہے اور یہ اسکیم یکم اپریل 2025 سے نافذ ہوگی۔ اپوزیشن یو پی ایس کو لے کر مودی حکومت پر حملہ آور ہے اور اولڈ پنشن اسکیم (او پی ایس) کا مطالبہ کر رہی ہے۔ ادھر بھوجپوری لوک گلوکارہ نیہا سنگھ راٹھور نے بھی یو پی ایس پر اپنا ردعمل ظاہر کیا ہے۔

بھوجپوری لوک گلوکارہ اور شاعرہ نیہا سنگھ راٹھور نے یو پی ایس کو لے کر مودی حکومت کو نشانہ بنایا ہے۔ یو پی ایس کے حوالے سے نیہا سنگھ راٹھور نے سوشل میڈیا اکاؤنٹ پر لکھاکہ ’’اولڈ پنشن اسکیم (او پی ایس) چاہئے، الٹی پلٹی اسکیم (یو پی ایس )  نہیں چاہئے۔سرکاری ملازمین کے ساتھ دھوکہ دہی بند کیجئے۔‘‘

مرکزی حکومت سرکاری ملازمین کے لیے ایک نئی پنشن اسکیم، یونیفائیڈ پنشن اسکیم لائی ہے۔ یہ مودی حکومت کی نئی 3.0 اسکیم ہے۔ یہ اسکیم اپریل 2025 سے نافذ کی جائے گی۔ واضح رہےکہ اب پنشن کے فوائد حاصل کرنے کے لیے سرکاری ملازمین کو یو پی ایس اور نئی پنشن اسکیم میں سے کسی ایک کا انتخاب کرنا ہوگا۔ پرانی اور نئی پنشن اسکیموں کی جگہ یونیفائیڈ پنشن اسکیم لائی گئی ہے۔

نئی پنشن سکیم کے تحت اگر کوئی سرکاری ملازم 25 سال خدمات انجام دینے کے بعد ریٹائر ہوتا ہے تو اسے گزشتہ 12 ماہ کی بنیادی تنخواہ کا 50 فیصد بطور پنشن دیا جائے گا۔ اگر کوئی ملازم 10 سال تک کام کرتا ہے تو اسے تقریباً 10,000 روپے پنشن دی جائے گی۔ اس کے ساتھ ہی کچھ ریاستوں میں سرکاری ملازمین کے لیے پرانی پنشن اسکیم بھی لاگو ہے، لیکن نئی پنشن اسکیم کو لے کر اپوزیشن مودی حکومت پر شدید حملہ کر رہی ہے۔