چار جون کو این ڈی اے حکومت گرنے والی ہے، وزیر اعظم مودی خوفزدہ: تیجسوی یادو

پٹنہ: بہار کے سابق نائب وزیر اعلیٰ اور قائد حزب اختلاف تیجسوی یادو نے وزیر اعظم مودی کو نشانہ پر لیا ہے۔ انہوں نے دعویٰ کیا کہ 4 جون کو این ڈی اے حکومت گرنے جا رہی ہے۔ تیجسوی یادو پٹنہ میں صحافیوں سے گفتگو کر رہے تھے۔

انہوں نے کہا کہ وزیر اعظم مودی کو علم ہے کہ بہار اور ملک کے عوام تاناشاہ حکومت کو ہٹانا چاہتے ہیں۔ تیسرے مرحلے کے الیکشن کے بعد ہم لوگ بہت اچھی پوزیشن میں ہیں۔ انتخابات سے قبل جو لوگ سمجھتے تھے وہ انگلی چبانے کا کام کر رہے ہیں۔ ہم لوگ پوری طرح سے پراعتماد ہیں کہ 4 جون کو این ڈی اے حکومت گرنے جا رہی ہے۔

لالو پرساد یادو پر وزیر اعظم مودی کی جانب سے کئے گئے تبصرے پر تیجسوی یادو نے کہا کہ وزیر اعظم مودی کب لالو یادو کے خلاف نہیں بولتے؟ پی ایم مودی دن بھر ہم لوگوں کے خلاف بولتے رہتے ہیں۔ آپ دیکھئے نا، ہم کو دوسری ریاست میں جا کر گالی دے رہے ہیں۔ وہ گھبرائے ہوئے ہیں، خوفزدہ ہیں، وہ صرف جھوٹ بولتے ہیں۔

ریزرویشن کے سوال پر انہوں نے کہا کہ ہم لوگوں نے ذات پر مبنی مردم شماری کے بعد جو ریزرویشن میں اضافہ کیا ہے اسے نویں شیڈیول میں شامل کیوں نہیں کیا گیا؟ وزیر اعظم مودی جمہوریت اور آئین کو ختم کرنا چاہتے ہیں۔ وزیر اعظم کے قول اور فعل میں بھاری تضاد ہے۔ انہیں ’دھرم شاستر‘ سیکھنا چاہئے۔ ’دھرم‘ کے ساتھ ’کرم‘ کی بھی بات کریں کہ 10 برسوں تک آپ نے کیا کیا، آپ نے بہار کے لئے کیا کیا؟