دلتوں کے خلاف منادی معاملے میں قومی درج فہرست ذات کمیشن نے یوپی حکومت کو بھیجا نوٹس

اتر پردیش کے مظفر نگر واقع ایک گاؤں میں سابق پردھان کے ذریعہ دلتوں کے خلاف کھلی منادی کرانے کے معاملے کا قومی درج فہرست ذات کمیشن نے از خود نوٹس لیتے ہوئے یوپی حکومت سے جواب طلب کیا ہے۔ کمیشن نے مظفر نگر کے ضلع مجسٹریٹ اور ایس ایس پی کو 15 دنوں کے اندر کارروائی رپورٹ پیش کرنے کی ہدایت دی ہے۔

منادی معاملے کی ویڈیو سوشل میڈیا پر وائرل ہو رہی ہے جس پر قومی درج فہرست ذات کمیشن نے توجہ دیتے ہوئے نوٹس جاری کیا ہے۔ دراصل ویڈیو میں ایک نوجوان ڈھول بجاتے ہوئے کہہ رہا ہے کہ راجبیر پردھان کی طرف سے منادی کرائی جا رہی ہے، کوئی بھی درج فہرست ذات کا شخص اس کی ڈول پر، سمادھی پر، ٹیوب ویل پر نظر نہ آئے۔ اگر کوئی نظر آتا ہے تو اس پر پانچ ہزار روپے کا جرمانہ لگے گا۔ اسی کے ساتھ اسے 50 جوتے بھی لگیں گے۔

اس معاملے پر نوٹس جاری کرنے کی جانکاری دیتے ہوئے قومی درج فہرست ذات کمیشن کے سربراہ وجئے سامپلا نے کہا کہ یہ ایک انتہائی قابل مذمت واقعہ ہے۔ اتر پردیش پولیس نے ابھی تک کیا کارروائی کی ہے، اتر پردیش ڈی جی پی اور حکومت مکمل جانکاری کمیشن کو جلد بھیجے۔

قابل ذکر ہے کہ یہ بے حد قابل اعتراض اور ذات پر مبنی منادی مظفر نگر کے پاوٹی خرد کے سابق پردھان راجبیر کے ذریعہ گاؤں میں کرائی گئی تھی۔ راجبیر بدنام زمانہ گینگسٹر رہے وکی تیاگی کے والد ہیں۔ وکی تیاگی کا قتل 2015 میں کر دیا گیا تھا۔