مسلم طالب علم عرفان نے یوپی سنسکرت بورڈ میں کیا ٹاپ، ٹیچر بننے کی خواہش

چندولی: چندولی کے ایک اسکول کے ایک مسلمان طالب علم نے اتر پردیش سیکنڈری سنسکرت ایجوکیشن کونسل، لکھنؤ کے ذریعہ منعقدہ یوپی سنسکرت بورڈ کے امتحان میں ٹاپر بن کر تاریخ رقم کی ہے۔ اتر مدھیما یعنی انٹرمیڈیٹ کے طالب علم عرفان نے 82.72 فیصد نمبر حاصل کر کے پورے اتر پردیش میں پہلی پوزیشن حاصل کی ہے۔ عرفان کی اس کامیابی کا خوب چرچا ہو رہا ہے اور اس سکول کے اساتذہ بھی بہت خوش ہیں۔

عرفان کو سنسکرت کے مضمون میں بہت کم نمبر ملے ہیں لیکن اس کے باوجود عرفان کے دوسرے مضامین میں اچھے نمبر ہیں۔ اس کے نتیجے میں عرفان نے اتر پردیش سیکنڈری سنسکرت ایجوکیشن کونسل کے ذریعہ منعقدہ اتر مدھیما یعنی انٹرمیڈیٹ امتحان میں پوری ریاست میں پہلی پوزیشن حاصل کی ہے۔

عرفان کو لازمی سنسکرت کے پہلے پرچہ میں 50 میں سے 19 نمبر ملے جبکہ عرفان کو لازمی سنسکرت کے دوسرے سوالیہ پرچے میں صرف 20 نمبر ملے۔ اس کے علاوہ ادب اول میں 100 میں سے 93، ادب دوم میں 100 میں سے 83، ہندی میں 100 میں سے 82، سوشیالوجی میں 100 میں سے 87، جغرافیہ میں 100 میں سے 97 اور انگریزی مضمون میں 100 میں سے 70 نمبر آئے ہیں۔ اتر مدھیما کے پہلے سال میں عرفان نے کل 700 نمبروں میں سے 607 نمبر حاصل کیے ہیں۔ گیارہویں اور بارہویں سال کے نمبروں سمیت عرفان نے کل 1400 نمبروں میں سے 1158 نمبر حاصل کیے ہیں۔

مشرقی اتر پردیش کے چندولی ضلع کی سکل ڈیہا تحصیل کے جنداس پور گاؤں کا رہنے والا عرفان گاؤں سے کچھ فاصلے پر واقع شری سمپورنانند سنسکرت اتر سیکنڈری اسکول پربھوپور میں زیر تعلیم ہے۔ عرفان کا تعلق انتہائی غریب گھرانے سے ہے۔ والد صلاح الدین مزدوری اور کھیتی باڑی کر کے گھر چلاتے ہیں۔ 18 سالہ عرفان اپنے والدین کا اکلوتا بیٹا ہے۔

عرفان کے سکول کے اساتذہ کے مطابق وہ پڑھنے لکھنے میں بہت ذہین لڑکا ہے اور اس کی لکھاوٹ بھی بہت خوبصورت ہے۔ اساتذہ نے یہ بھی بتایا کہ عرفان مستقبل میں استاد بننا چاہتا ہے۔ جاری کردہ نتائج میں بلیا کے شیو دیال گپتا دوسرے اور پرتاپ گڑھ کے وکاس یادو تیسرے نمبر پر رہے۔