مسلم پولس اہلکاروں کو داڑھی رکھنے کی اجازت، گہلوت حکومت کے حرکت میں آنے پر ’تغلقی فرمان‘ واپس

الور: راجستھان میں الور ضلع کے ایس پی پریس دیشمکھ کو اپنے اس ’تغلقی فرمان‘ کو ایک دن بعد ہی واپس لینا پڑا ہے جس میں انہوں نے 9 مسلم پولس اہلکاروں کو داڑھی نہ رکھنے کا حکم دیا تھا۔ پریس دیشمکھ نے 21 نومبر کو یہ حکم جاری کرتے ہوئے ان پولس اہلکاروں کو داڑھی رکھنے کے حوالہ سے ملی ہوئی اجازت کو منسوخ کرنے کا حکم دیا تھا۔

الور کے ایس پی (سپرنٹنڈنٹ آف پولس) پریس دیشمکھ نے جمعرات کے روز حکم جاری کیا تھا اور 9 پولس اہلکار کو ملی ہوئی داڑھی رکھنے کی اجازت کو منسوخ کیا تھا۔ ان 9 مسلم پولس اہلکار میں 7 کانسٹیبل، ایک ایس آئی (سب انسپکٹر) اور ایک ہیڈ کانسٹیبل شامل ہیں۔ ایس پی پریس دیشمکھ کا کہنا تھا کہ ضلع میں نظم و نسق کی صورت حال کو برقرار رکھنے اور غیر جانبداری کے حق میں یہ حکم جاری کیا گیا ہے۔

الور ایس پی کے حکم کے بعد مسلم طبقہ میں سخت ناراضگی پائی جا رہی تھی اور کانگریس سمیت مختلف سیاسی جماعتوں کی جانب سے اس اقدام کی سخت الفاظ میں مذمت کی گئی تھی۔ معاملہ کی حساسیت کے پیش نظر صوبہ کی گہلوت حکومت حرکت میں آ گئی اور وزارت داخلہ اور جےپور میں واقع پولس کے صدر دفتر سے فوری طور پر ایکشن لیا گیا۔ نتیجتاً حکم جاری کرنے کے ایک دن بعد ہی الور ایس پی کو اپنے حکم کو واپس لینا پڑا۔

چنڈی گڑھ ہائی کورٹ میں سینئر ایڈوکیٹ اور پونہانہ سے کانگریس کے رہنما فاروق عبد اللہ نے اس معاملہ میں الور پولس کے خلاف ایک قانونی نوٹس بھی بھیج دیا تھا۔ ساتھ ہی انہوں نے سوشل میڈیا پر بھی اس حکم کے خلاف ناراضگی کا اظہار کیا تھا۔ وہیں الور اور میوات علاقہ کی مختلف تنظیموں نے اس حکم کے خلاف تحریک چھیڑنے کا اعلان کر دیا تھا۔