مسلمانوں کے مسائل پر غور و خوض کیلئے مشاورت جلدایک کنونشن منعقد کرے گی: سید تحسین احمد

آل انڈیا مسلم مجلس مشاورت نے مسلمانوں کے مسائل کے حل کے تئیں اپنی سنجیدہ کوشش کا اعادہ کرتے ہوئے کہاکہ مشاورت جلدہی ایک کنونشن منعقد کرنے جارہی ہے جس میں ملک کے ممتاز دانشوروں کی موجودگی میں مسلمانوں کے مسائل کے حل کے سلسلے میں لائحہ عمل تیار کیا جائے گا۔ یہ بات مشاورت کے سابق صدر نوید حامد، جنرل سکریٹری سید تحسین احمد اور یوتھ جنرل سکریٹری شمس الضحی نے مشترکہ طور پر میڈیاسے بات کرتے ہوئے کہی۔

انہوں نے اپنے دورہ بہار اور پٹنہ میں منعقدہ میٹنگ کی روداد پیش کرتے ہوئے کہاکہ بہار کے دورہ کے دوران لوگوں سے جوتعاون ملا اور ان کی دلچسپی دیکھنے میں آئی اس سے ہمیں حوصلہ ملا ہے اور اب اس ضمن میں مشاورت کا وفدمہاراشٹر کادورہ کرنے بعد جھارکھنڈ کا دورہ کرے گا۔ انہوں نے کہاکہ اس کا مقصد جہاں لوگوں کو مشاورت سے جوڑنا ہے وہیں انہیں سماجی اور ملی ذمہ داری سے بھی آگاہ کرنا ہے۔ انہوں نے کہاکہ بہار میں ایک ایڈہاک کمیٹی تشکیل کردی گئی ہے اور اس کو ضلعی کمیٹی کی تشکیل کی ذمہ داری دی گئی ہے، جس کے بعد چھ ماہ کے اندر ریاستی کمیٹی کا انتخاب عمل میں آئے گا۔

انہوں نے کہاکہ وہ لوگ ملک کے حالات سے آگاہ ہیں اور ملک میں آئندہ ہونے والے عام انتخابات کے پیش نظر جو نفرت کا ماحول بنایا جارہا ہے خاص طور پر مہاراشٹر، اتراکھنڈ اور دیگر مقامات پر جس طرح کے واقعات پیش آرہے ہیں، اس سے اندازہ لگانا قطعی مشکل نہیں ہے کہ وہ لوگ مسلمانوں کو اشتعال دلاکر اپنا ایجنڈہ پورا کرنا چاہتے ہیں۔انہوں نے کہاکہ اسی ضمن میں ایک کنونشن بلائی جارہی ہے جس میں مسلمانوں کے مسائل پر سنجیدگی سے غور کیا جائے گا اور حل کی صورت نکالی جائے گی جو طریقہ کار اختیار کرمناسب ہوگا وہ کیا جائے گا۔

انہوں نے اعتراف کیا کہ مسلم مجلس مشاورت کوئی کیڈر بیس تنظیم نہیں ہے بلکہ ایک امبریلا تنظیم ہے، اس کے پاس محدود وسائل ہیں، کوشش کی جاری ہے کہ زیادہ سے زیادہ لوگوں اور نوجوانوں کو جوڑ کر اس تنظیم کو مسلمانوں کے مسائل کے حل کے قابل بنایا جائے۔

سید تحسین احمد نے کہاکہ اس سلسلے میں انجینئرسمش الضحی کو یوتھ کی ذمہ داری دی گئی ہے تاکہ وہ نوجوانوں کو زیادہ سے زیادہ جوڑ سکیں اور مشاورت سچ مچ مسلمانوں کے لئے ایک بہتر تنظیم ثابت ہو۔ پریس مانفرنس سے احمد جاوید بھی خطاب کیا۔