ممبئی کے ’سی ایس ٹی‘ کو دھماکے سے اڑانے کی دھمکی، محکمہ پولیس متحرک

ممبئی: جنوبی ممبئی کے چھترپتی شیواجی ٹرمینس (سی ایس ٹی) ریلوے اسٹیشن اور شہر کے مضافاتی کرلا ریلوے اسٹیشن کو جمعہ کو دھماکے سے اڑانے کی دھمکی ملنے کے بعد محکمہ پولیس میں افرا تفری مچ گئی۔ جس کے بعد دونوں اسٹیشنز پر پانچ گھنٹے سے زائد تلاشی لی گئی تاہم کوئی مشکوک چیز نہیں برآمد نہیں ہوئی۔

پولیس کنٹرول روم میں کال موصول ہونے پر ریلوے پولیس پروٹیکشن فورس اور بم ڈسپوزل اسکواڈ سمیت پولیس اہلکاروں نے ریلوے اسٹیشن پر پانچ گھنٹے سے زائد تک سرچ آپریشن چلایا۔

ریلوے کمشنر قیصر خالد نے کہا ’’فون کرنے والے نے سی ایس ٹی اور کرلا ریلوے اسٹیشنوں کو دھماکہ خیز مادے سے اڑانے کی دھمکی دی۔ اس کے بعد پولیس کی مختلف ٹیموں نے دونوں تھانوں کے کونے کونے کی تلاشی لی۔

خالد نے کہا کہ سرچ آپریشن کے دوران پولیس ٹیموں کو کوئی مشکوک چیز نہیں ملی، فون کرنے والے کی شناخت کر لی گئی ہے اور معاملے کی تفتیش شروع کر دی گئی ہے۔