ووٹرس کی حوصلہ افزائی کے لیے ممبئی میٹرو کا خوش آئند قدم، کرایہ میں 10 فیصد رعایت کا اعلان

لوک سبھا انتخابات کے پیش نظر ممبئی میٹرو نے ووٹنگ کے دن ٹکٹوں پر خاص رعایت دینے کا فیصلہ کیا ہے۔ مہا ممبئی میٹرو آپریشن کارپوریشن لمیٹیڈ نے جمعہ (3 مئی) کو اس کا اعلان کیا ہے۔ اس اعلان کے تحت لوک سبھا انتخابات کے پانچویں مرحلے میں 20 مئی کو ہونے والی ووٹنگ کے موقع پر ممبئی میٹرو میں مسافروں کے لیے ٹکٹوں پر 10 فیصد رعایت دی جائے گی۔

مہا ممبئی میٹرو آپریشن کارپوریشن لمیٹیڈ کی طرف سے جاری کردہ ایک پریس ریلیز کے مطابق میٹرو لائن 2A اور لائن 7 پر سفر کرنے والے مسافر ووٹنگ کے دن 10 فیصد رعایت حاصل کر سکتے ہیں۔ عام انتخابات کے لیے ممبئی میں لوک سبھا سیٹوں پر 20 مئی کو ووٹ ڈالے جائیں گے۔ خبر رساں ایجنسی پی ٹی آئی کے مطابق مہا ممبئی میٹرو آپریشن کارپوریشن لمیٹیڈ اندھیری (مغرب) اور دہیسر (مشرق) کے درمیان میٹرو لائن 2A اور دہیسر (مشرق) اور اندھیری (مشرق) کے درمیان لائن 7 چلاتی ہے۔ ریلیز میں کہا گیا ہے کہ یہ اقدام میٹرو مسافروں کو اپنے شہری فرائض کو پورا کرنے اور الیکشن میں ووٹنگ کرنے کی حوصلہ افزائی کرنے کے لیے سسٹمیٹک ووٹر ایجوکیشن اور الیکٹورل پارٹیسیپیشن (SVEEP) پروگرام کے تحت ووٹنگ کو فروغ دے گا۔

ممبئی میٹرو میں سفر کرنے کے لیے مسافر ممبئی ون کارڈ، پیپر کیو آر اور پیپر ٹکٹ کا استعمال کر سکتے ہیں۔ پریس ریلیز میں کہا گیا ہے کہ مسافر ووٹنگ کے دن بنیادی کرایہ پر 10 فیصد رعایت حاصل کر سکتے ہیں۔ واضح رہے کہ مہاراشٹر میں لوک سبھا انتخابات 2024 کے لیے نامزدگی کا پانچواں اور آخری مرحلہ جمعہ کو ہے۔ مہاراشٹر میں لوک سبھا کی کل 48 سیٹیں ہیں۔ الیکشن کمیشن ریاست میں پانچ مختلف مرحلوں میں ووٹنگ کرا رہا ہے۔