ممبئی: سابق اسسٹنٹ کمشنر شمشیر خان پٹھان کی ضمانت پر رہائی کے بعد دوبارہ گرفتاری

ممبئی: سبکدوش پولیس افسر و عوامی وکاس پارٹی نامی سیاسی پارٹی کے سربراہ شمشیر خان پٹھان کی آج یہاں شہری ترمیم قانون کے خلاف مسلم خواتین کی جانب سے ممبئی باغ میں جاری احتجاج کے دوران ایک خاتون کے ہتک عزت کے معاملے میں آج مقامی عدالت کی جانب سے ضمانت پر رہائی کے بعد مقامی ناگپاڑہ پولیس اسٹیشن نے انہیں تین برسوں پرانے ایک معاملے میں دوبارہ گرفتار کر لیا -
موصولہ اطلاعات کے مطابق سیوڑی عدالت نے شمشیر خان پٹھان اور مجلس اتحادالمسلمین کے ممبئی صدر اور سابق رکن اسمبلی فیاض احمد کو پندرہ ہزار نقد ادا کرنے کے بعد مشروط ضمانت پر رہا کیا تھا -

سیوڑی عدالت میں جیوں ہی ملزمین کو ضمانت دی گئی پورے ناگپاڑہ پولیس اسٹیشن کاغذی کارروائی کیلئے لایا گیا جہاں پر کاغذی کارروائی اور دیگر کارروائیوں کے بعد فیاض احمد کو تو رہا کر دیا گیا اور انہیں ایک پولیس کانسٹیبل بذریعہ پولیس جیپ سے ان کی رہائش گاہ چھوڑ کر آ گیا لیکن جیوں ہی شمشیر خان پٹھان کی کاغذی کارروائی مکمل ہوئی انہیں تین سالا پرانے ایک کیس میں گرفتار کر لیا گیا -

اطلاعات کے مطابق شمشیر خان پٹھان نے شہر کے ایک بلڈر کے خلاف شکلا جی اسٹریٹ کے چند مکینوں کے ہمراہ مل کر بلڈر کی جانب سے کی گئی بدعنوانیوں کے خلاف احتجاج کیا تھا جس پر پولیس نے مقدمہ درج کیا تھا - آج اسی مقدمہ کے تحت شمشیر خان پٹھان کی گرفتاری عمل میں آئی ہے اور کل انہیں گڑی پاڑوا تہوار کے پیش نظر تعطیلی عدالت میں پیش کیا جائے گا -