ممبئی: ’بابل ناتھ شیو مندر‘ کے شیولنگ میں شگاف، آئی آئی ٹی بامبے کی تحقیقی رپورٹ میں حیرت انگیز وجہ آئی سامنے

جوشی مٹھ میں موجود کچھ مندروں میں شگاف کے بعد اب ممبئی واقع ’بابل ناتھ شیو مندر‘ کے شیولنگ میں شگاف کی خبریں سامنے آ رہی ہیں۔ حالانکہ بابل ناتھ شیو مندر کے شیولنگ میں پڑے شگاف کی وجہ جوشی مٹھ کے مندروں میں پڑنے والے شگاف سے بہت الگ ہے۔ دراصل آئی آئی ٹی بامبے کی ایک تحقیقی رپورٹ میں شیولنگ میں شگاف پڑنے کی اطلاع دی گئی ہے اور ساتھ ہی اس کی وجہ کو لے کر حیرت انگیز انکشاف بھی کیا گیا ہے۔ ابتدائی رپورٹ میں بتایا جا رہا ہے کہ ملاوٹی ابیر، گلال، بھسم، کمکم چندن، دودھ چڑھاوے کی وجہ سے شیولنگ کو نقصان پہنچا ہے۔

واضح رہے کہ بابل ناتھ مندر میں نصب شیولنگ 12ویں صدی کا ہے۔ یہ مندر جنوبی ممبئی کے مالابار ہل کی ایک چھوٹی پہاڑی پر واقع ہے۔ مندر سولنکی دور کا ہے جب اس نسل کے بادشاہوں نے تیرہویں صدی تک مغربی ہندوستان پر حکومت کی تھی۔ بہرحال، ایسا پہلی بار ہوا ہے جب شیولنگ کو نقصان پہنچنے کی خبر سامنے آئی ہے۔

بتایا جاتا ہے کہ مندر سے متعلق ریسرچ آئی آئی ٹی بامبے کے ذریعہ کی جا رہی ہے اور یہ فی الحال ابتدائی مرحلے میں ہے۔ اس کی مکمل رپورٹ ایک ماہ میں آنے کی امید ظاہر کی جا رہی ہے۔ مندر کے پجاریوں نے 8 سے 10 ماہ میں دیکھا کہ شیولنگ کو نقصان پہنچ رہا ہے اور اس میں شگاف پڑ رہا ہے۔ حالانکہ مندر کے ٹرسٹیوں کا دعویٰ ہے کہ شیولنگ ٹوٹا نہیں ہے۔

موصولہ اطلاعات کے مطابق شیولنگ کو ٹوٹ پھوٹ سے بچانے کے لیے مندر انتظامیہ آئی آئی ٹی ممبئی کی مدد لے رہا ہے۔ اسی درمیان مندر انتظامیہ کی طرف سے شیولنگ پر پھول، پھل اور پانی کے علاوہ بھی چڑھانے سے روک لگا دی ہے۔ شیولنگ پر عقیدتمند صبح 6 بجے سے دوپہر 12 بجے تک ہی ’جلابھشیک‘ (پانی چڑھانا) کر سکتے ہیں۔